Оилада чақалоқ туғилиши билан оналарнинг уйқусиз тунлари бошланади. Бу мутлақо табиий жараён — болани соатма-соат озиқлантириш, камига у коликдан қийналади, умуман олганда, бола ота-онанинг меҳр-мурувватисиз ухлаб қолиши мушкул. Аммо гўдак ўсади ва баъзида бу муаммо умуман йўқолмайди. Гўдак кечаси ҳам уйғонади, ҳам ухлаб қолиши қийин кечади ва тартиб ҳали бери эришиб бўлмайдиган даражада узоқ деган фикр туғилади.
Болалар эрготерапевти ва педиатри Эмма Хаббард вазиятдан чиқиш йўллари бор, деб ҳисоблайди. У чақалоғингизни эрталабгача уйғонмасдан ухлаши учун кечаси ётқизишда қўл келадиган тўртта оддий усул билан ўртоқлашди.
Болани ҳар куни бир вақтда уйғотинг
Кичкинтой ухлаб ётганида эрталаблари уни безовта қилишни ҳеч ким хоҳламайди. Бу вақтда онанинг ўзи бир оз мизғиб олиш ёки ўз юмушларини бажаришга улгуриб қолиш истаги бор. Бироқ болага тартиб керак. Мутахассиснинг таъкидлашича, уни ўрнатиш учун чақалоқни эрталаб бир вақтнинг ўзида (нари-бери ярим соат) уйғотишингиз керак, кейин гўдак организми бу одатга ўрганиб қолади ва тунги уйқу яхшиланади.
Чарчоқ белгиларини инобатга олинг
Уйқуга ётиш вақти ҳар хил бўлиши мумкин. Педиатрнинг сўзларига кўра, ота-оналар боланинг чарчаганини ўз вақтида сезишлари керак. Боланинг уйқуга тайёрлигини кўрсатадиган белгилар қуйидагилар бўлиши мумкин:
- одамлар ёки ўйинчоқларга қизиқиш йўқолади;
- бола нотинч ва безовта бўлади;
- узоқ вақт давомида бир нуқтага қараб қолади;
- инжиқлик, йиғлаш;
- мунтазам кўз ва қулоқларини ишқалайди;
- ҳиқичоқ тутади ёки тез-тез эснайди.
Сиз бу белгиларга эътиборли бўлишингиз ва болани уйқуга тайёрлашни бошлашингиз керак, чунки боланинг ортиқча чарчаб қолиши зарарга ишлайди. Агар чақалоқ ниҳоятда чарчаган бўлса, у кечаси кўп уйғонади.
Болани ухлатишдан олдин одатий юмушларни бажаринг
Кечқурун болани ухлатишдан аввал ота-оналар бир хил ҳаракатлар режасига эга бўлиши керак. Мисол учун чақалоқни чўмилтириш, унинг тишларини тозалаш, сўнгра тўшакда унга эртак ўқиб бериш ва ҳоказо. Ушбу қадамлар ҳар сафар бир хил тартибда бажарилиши керак. Шу тариқа бола тафаккурида сиз уни уйқуга тайёрлаётганингизнинг умумий картинаси ҳосил бўлади ва организм бу одатга мослашади.
Қулай уйқу муҳитини яратинг
Бу жуда оддий нарсалар бўлса-да, лекин кўп одамлар улар ҳақида унутишади. Қулайликнинг учта муҳим элементи — сукунат, қоронғилик ва ҳаво ҳарорати. Мана шу уч нарсадан доим хабардор бўлиш зарур. Агар хона жуда шовқин бўлса ва бирор жойдан бешикка ёруғлик тушиб турса ёки ҳаво тоза бўлмаса, боланинг уйқуси ёмонлашади. Шундай қилиб чақалоқни ўрнига ётқизишдан олдин қулайлик яратишга олдиндан ҳозирлик кўриш тавсия этилади.
Изоҳ (0)