Тошкент мезбонлигида ўтаётган бокс бўйича 2023 йилги Жаҳон чемпионатининг 7-кунги баҳслари 7 май, якшанба куни бўлиб ўтди.
-51 кг вазн тоифасида ҳаракат қилаётган Ҳасанбой Дўстматов нимчорак финалда Марокаш вакили Саид Мортажига қарши рингга кўтарилди. Унда Дўстматов устунлик қайд этди ва 5:0 ҳисобида ғалаба қозонди.
Ҳасанбой саралаш босқичида Мексика вакили Альберто Хименесдан устун келганди.
Супер оғир (+92 кг) вазн тоифасида Ўзбекистон шарафини ҳимоя қилаётган Баҳодир Жалолов эса австралиялик Теремоана Теремоана билан жанг қилди.
Биринчи раундда тенг кураш кечди, Жалолов аниқ зарбалар йўллашда яхшироқ ҳаракат қилди. Иккинчи раундда эса Баҳодир рақибига имкон қолдирмади: ҳакам икки бор ҳисобни очди, учинчисида эса жангни тўхтатиб, ўзбекистонлик боксчининг ғалабасини қайд этди.
Жалолов аввалги босқичда баҳрайнлик Данис Латиповни мағлуб этганди.
Шу тариқа Дўстматов ва Жалолов мусобақанинг чорак финалига йўл олди. Аввалроқ Абдумалик Ҳалоков ва Аълохон Абдуллаев ўз жангларини ғалаба билан якунлаганди.
Изоҳ (0)