Месси “ПСЖ” билан шартномани бекор қилиши мумкин. Унга 3 хил жамоадан қизиқиш бор

Ҳужумчи Лионель Месси ва “ПСЖ” клуби ўртасидаги муносабатлар таранг бўлиб турибди.

Можарога сабаб бўлган ҳолат ҳақида

Месси Лига 1 доирасидаги мағлубиятдан кейин Саудия Арабистонига кетиб қолди ва бу “ПСЖ” раҳбариятига ёқмади. Аргентиналик ҳужумчи “ПСЖ”нинг ўйин ва машғулотларидан 2 ҳафтага четлатилди.

Месси Саудия Арабистонида туризм бўйича элчи ҳисобланади. Унинг рухсат сўрамасдан Саудияга кетиб қолгани “ПСЖ”нинг қатарлик эгаларига ёқмагани ва дисквалификация сиёсий вазият билан боғлиқлиги айтилди.

Месси Парижда ёзгача қолмаслиги мумкин

L’Equipe нашрининг хабар қилишича, аргентиналик футболчи Париж клубининг ушбу қароридан кейин “ПСЖ”га қайтишни истамаяпти.

Месси яқин кунларда шартномани бекор қилиш борасида “ПСЖ” раҳбариятига сўров юбориши мумкин, дея хабар қилмоқда “Чемпионат” Le Parisien нашрига таяниб.

Клубнинг муносабатидан ташқари “ПСЖ” мухлисларининг ҳаракати ҳам Леога ёқмаяпти. Аввалроқ парижлик ишқибозлар клуб офиси ёнида норозилик намойиши ўтказган ва унда Мессини ҳақорат қилганди.

Бироқ клуб бу масала ҳақида ўйламаяпти. Агар Месси “ПСЖ”ни тарк этмоқчи бўлса, биринчи бўлиб қадам ташлаши керак бўлади. Бундан ташқари Париж жамоаси устози Кристоф Гальтье футболчининг сафга қайтишини истамоқда.

Таклифлар

Reuters хабарига кўра, Саудия Арабистонининг “Ал-Ҳилол” клуби 35 ёшли футболчига расмий таклиф юборган. Аввалроқ берилган хабарларда Месси араб диёрида йилига 400 миллион евро маош олиши мумкинлиги айтилганди.

Футболчининг ўзи учун “Барселона”га қайтиш режаси приоритетда турибди, дейилади RMC Sport хабарида. Месси каталон клубига қайтиш учун ҳозирги маошининг уч баробар камайишига ҳам рози — 30 миллиондан 10 миллион еврога.

“Барселона” раҳбарияти ҳам молиявий муаммоларга қарамай, Лео трансферини амалга оширишга ишонмоқда. Бироқ бунинг учун клуб Ла Лига рухсатини олиши керак бўлади.

Жанлука ди Марционинг хабар қилишича, Мессига АҚШнинг “Интер Майами” клубидан қизиқиш бор. Футболчининг отаси Хорхе Месси яқин орада майамиликлар билан музокара олиб боради.

35 ёшли футболчи Франция чемпионатининг жорий мавсумида 28 та ўйин ўтказиб, 15 тадан гол ва голли узатма муаллифига айланди.