Режиссёр Роберт Земекиснинг “Келажакка қайтиб” трилогияси юлдузи Майкл Жей Фокс Паркинсон касаллигидан азият чекмоқда. Актёрга 29 ёшида ушбу касаллик ташхиси қўйилган.
Майкл 1991 йилда ушбу касалликка чалинганини билди, бироқ шунга қарамай 2020 йилгача фильмларда суратга тушишни давом эттирди. Марти Макфлай роли билан машҳур бўлган 61 ёшли актёр CBS Sunday Morning дастурига берган интервьюсида ҳозирги кунда қандай яшаётгани ҳақида гапириб берди. Фокснинг сўзларига кўра, борган сари ушбу касалликка чидаш қийинлашмоқда, бироқ бунинг учун ҳеч нарса қилишнинг иложи йўқ.
“Сиз Паркинсон касаллигидан ўлмайсиз, касаллик билан ўласиз. Мен 80 ёшгача яшамайман ва бу ёшга кирмайман”, — дейди Майкл Жей Фокс.
Актёрнинг айтишича, у неча марта йиқилиб тушганини ҳисоблай олмайди, чунки касаллик ҳаракатларни мувофиқлаштиришни бузади. Бундан ташқари, бу касаллик овқатланиш билан боғлиқ қийинчиликларни келтириб чиқаради: озиқ-овқат нафас олиш йўлларига тушиши мумкин.
“Мен бу касалликка чалинган бошқа инсонлар учун қанчалик қийинлигини биламан, бироқ бу иш билан шуғулланишимга имкон берадиган маълум кўникмаларни ишлаб чиқдим. Мен оптимизм барқарор ҳолат эканини мамнуният билан тушуниб етдим. Агар атрофдан мамнун бўла оладиган нарсани топа олсангиз, унда сиз ҳаракат қилишга арзийдиган нарсани топишингиз мумкин”, — дейди актёр.
Инсонларда Паркинсон касаллигининг келиб чиқиш сабаблари аниқланмаган. Бироқ Фокс ўзи мисолида касалликни ёшлигидаги шўхликлари оқибати, дея изоҳлайди.
“Ўзингизга зарар беришнинг турлича усуллари бор. Мен бошимни деворга уришим мумкин эди, маълум муддат кўп алкогол ичишим мумкин эди. Катта эҳтимол билан қанақадир кимёвий моддалар ҳам менга салбий таъсир кўрсатган. Айтганимиздек, генетика қуролни ўқлайди ва турмуш тарзи тепкини тортади”, — дейди актёр.
Фокс узоқ вақтдан бери Паркинсон касаллигини ўрганиш тарафдори бўлиб, 2000 йилда касалликка бағишланган жамғармага асос солган. Унинг ташкилоти эрта ташхис қўйиш ва даволашда муҳим рол ўйнайди. 23 йил ичида Майкл 1,75 миллиард доллар йиғишга муваффақ бўлди.
“Бу ҳамма нарсани ўзгартиради. Келгуси беш йил ичида шифокорлар сизда бу касаллик бор ёки йўқлигини, келажакда касаликка чалинасизми ёки йўқми аниқ айта олади. Кейин касалликни қандай даволашни ўрганамиз”, — дейди актёр.
Изоҳ (0)