Германияга ташриф доирасида Шавкат Мирзиёев ва Германия президенти Франк-Валтер Штайнмайер Берлин шаҳридаги жаҳонга машҳур Жеймс Симон галереясида “Ўзбекистоннинг археологик хазиналари. Македониялик Искандардан Кушонлар салтанатигача” номли ноёб кўргазмани очди. Бу ҳақда Президент матбуот хизмати хабар берди.
Давлат раҳбари очилиш маросимида икки мамлакат халқларининг бой маданий мероси ва бугунги ютуқларига қизиқиш ортиб бораётганини мамнуният билан қайд этган. Кўргазманинг очилиши Ўзбекистон ва Германия ўртасидаги маданий алоқаларда диққатга сазовор воқеа бўлди. Унинг ўтказилиши ҳақида Германия федерал президенти Франк-Валтер Штайнмаернинг 2019 йил майдаги Ўзбекистонга ташрифи чоғида келишилган эди.
Қайд этилишича, қарийб тўрт йил давомида икки мамлакат археологлари, тарихчилари, санъатшунослари ва музей ходимлари тадбирни ташкиллаштириш устида фидокорона меҳнат қилган. Германиялик мутахассислар иштирокида 50 га яқин энг қимматли осори-атиқалар реставрация қилинган.
2024 йил 14 январь кунига қадар давом этадиган кўргазмада Берлин давлат музейлари тўпламларидан 65 та ва Ўзбекистон музейлари тўпламларидан 285 та экспонат намойишга қўйилган. Уларнинг кўпи Ўзбекистон ташқарисида илк бор кўрсатилмоқда.
Кўргазма мамлакатнинг қадимий ва бой маданияти, бугунги Ўзбекистон ва Марказий Осиё ҳудудида жойлашган илк давлатларнинг милоддан аввалги VI асрдан милодий IV асргача бўлган даврни қамраб олган тарихи ҳақида сўзлайди. Бу ердаги дурдоналар орасида Кушон салтанатининг Далварзинтепа ва Ҳолчаён қўрғонларидан топилган аслзодалар, аскар ва бадавлат аёллар ҳайкаллари бор.
“Ушбу бетакрор экспозиция ташриф буюрувчиларга Ўзбекистон тарихи билан танишиш, халқимиз мероси тўғрисида тўлиқ тасаввур ҳосил қилиш имконини беради”, — дейилади хабарда.
Тадбир Ўзбекистон ва Германия халқларининг янада яқинлашиши ва бир-бирини англашига, икки мамлакат ўртасидаги кенг мулоқот ва кўп қиррали ҳамкорликнинг ривожланишига хизмат қилади. Ўзбекистон президентининг Германияга ташрифи муносабати билан икки мамлакат делегациялари аъзолари, давлат ва жамоат арбоблари иштирокида қабул маросими бўлиб ўтди.
Ўзбекистон президенти Шавкат Мирзиёевнинг Германияга икки кунлик ташрифи якунланди. Ташриф дастуридаги тадбирлар якунлангач, “Берлин-Браденбург” аэропортида олий мартабали меҳмонни Германиянинг расмий шахслари кузатиб қўйди. Давлат раҳбари Тошкентга жўнаб кетди.
Изоҳ (0)