Соч оқариши — табиий жараён бўлиб, уни назорат қилиб бўлмайди, бироқ баъзи омиллар бу жараёнда ҳали ҳам муҳим рол ўйнаши мумкин.
Шуни билиш керакки, олимлар ва шифокорлар сочлар оқаришининг асосий сабабини генетикага боғлайди. Ота-онангиз ва бобо-бувингизнинг соч қанчалик тез оқариб кетган бўлса, сизда ҳам худди шундай ҳолат такрорланиши эҳтимоли бор. Бундан ташқари, этник келиб чиқиши ва ирқи соч оқара бошлайдиган вақтни аниқлай олади. Масалан, осиёликларда бошқа ирқ вакилларига қараганда эрта соч оқариши эҳтимоли кўпроқ экани аниқланган.
Бироқ бу сиз профилактика чораларини кўришингиз мумкин эмас дегани эмас. Сочни бўяб муаммони ҳал қилиш мумкин, бироқ бу узоқ вақт сақланмайди. Соч оқаришини олдини олиш эса тўғри йўл ҳисобланади. Бу имконсиз бўлиб туюлиши мумкин, бироқ кундалик айрим зарарли одатлардан чекланиш соч оқаришининг олдини олиши мумкин.
Рационда озуқа моддаларининг етишмаслиги
Баъзи озуқа моддалари сочларнинг эрта оқариб кетишида муҳим рол ўйнайди. Темир, мис, B витаминлари, ёд ва омега-3 нинг етишмаслиги, шунингдек, қадоқланган, носоғлом ёки қайта ишланган озиқ-овқатларни истеъмол қилиш сочларнинг эрта ва тез оқариб кетишига олиб келади. Бизнинг организмимиз энергия учун истеъмол қилинадиган “ёқилғи”га жуда боғлиқ, шунинг учун нима еяётганингизга алоҳида эътибор беринг.
Чекиш
Чекиш соғлиқ учун зарарли ва бу ҳақиқат ҳаммага маълум. Бу тананинг барча аъзоларига зарарли таъсир кўрсатади ва қаришга, сочларнинг оқаришига сабаб бўлади. Чекиш барча ёшдаги инсонларда сочларнинг эрта оқариб кетиши билан боғлиқлигини кўрсатадиган тадқиқотлар мавжуд, шунинг учун бу одат сизда бўлса, ундан воз кечишга ҳаракат қилинг.
Стресс даражасининг ошиши
Стресс — жисмоний ва руҳий саломатлигингизнинг энг катта душмани бўлиши мумкин. Стресснинг кучайиши таъсири биринчи навбатда тери ва сочларда намоён бўлади. Шу билан бирга, бугунги кунда стрессга тушиш ва унга боғлиқ жараёнлар жуда кенг тарқалган, шунинг учун улар билан самарали кураша олиш муҳим ҳисобланади. Стрессни олдини олиш учун тоза ҳавода кўпроқ вақт ўтказинг, медитация ва тинчлантирувчи усулларни синаб кўринг, иложи бўлса, сизни безовта қилувчи омилларни ҳаётингиздан чиқариб ташланг ва уйқу сифатини кузатиб боринг.
Режалаштирилган текширувларга эътибор бермаслик
Баъзи тиббий шароитлар (масалан, қалқонсимон без касалликлари) сочларнинг эрта оқариб кетишига олиб келиши мумкин, шунинг учун шифокор текширувига бориш ва ўз вақтида текширувдан ўтиш муҳим. Дерматологлар ва трихологлар буни тартибга солишга ёрдам беради ва жиддийроқ муаммони истисно қилади.
Кимёвий бирикмаларнинг таъсири
Бўёқлар, бошқа парваришлаш ёки декоратив маҳсулотлардан фойдаланиш, сочларга кимёвий ишлов бериш сочларнинг эрта оқариб кетишига олиб келади. Кимёвий моддаларнинг тез-тез таъсир қилишидан сақланган маъқул — ишлатилган маҳсулотларнинг таркибини диққат билан ўрганинг ва сочларингизни ишончли мутахассисларга ишонинг.
Изоҳ (0)