Давлат статистика агентлигининг маълумоти асосида 2022 йилда ҳудудларда аҳолининг умумий даромадлари кўрсаткичлари таҳлил қилинди. Бу ҳақда “Дарё”га Иқтисодий тадқиқотлар ва ислоҳотлар маркази хабар берди.
2022 йил якунларига кўра, аҳолининг умумий даромадлари 634,8 трлн сўмни ва номинал ўсиш кўрсаткичи 122,3 фоизни ташкил этди.
Бунда истеъмол нархларининг ўзгариши (нархлар ўзгариши омиллари таъсири) ҳисобига ўтган йилнинг мос даврига нисбатан аҳолини умумий даромадларининг реал ўсиш суръати 109,7 фоизни ташкил этди.
Ҳудудлар кесимида аҳоли жон бошига умумий даромадлар ҳажми қуйидаги вилоятларда ўртача мамлакат даражасидан юқори:
- Тошкент шаҳрида — 37,5 млн сўм;
- Навоий — 27,4 млн сўм;
- Бухоро — 21,4 млн сўм;
- Хоразм — 19,6 млн сўм;
- Тошкент — 18,1 млн сўм.
Шу билан бирга, аҳоли жон бошига умумий даромадлар ҳажмининг энг паст кўрсаткичлари:
- Қорақалпоғистон — 13,3 млн сўм;
- Фарғона — 13,6 млн сўм;
- Наманган — 13,9 млн сўм.
Шунингдек, ҳисобот даврида аҳоли жон бошига умумий даромадларнинг реал ўсиши (номинал умумий даромадларининг инфляция индексига нисбати) 107,5 фоизни ташкил этди.
Бу 2021 йилнинг январь—декабрь ойларидаги худди шу кўрсаткичга (110,7 фоиз) нисбатан 3,2 фоизга пасайганлигини кўриш мумкин.
Ҳудудлар кесимида аҳоли жон бошига умумий даромадларнинг реал ўсиш ҳолати ўрганилганда, аҳоли жон бошига умумий даромадларнинг энг юқори реал ўсиш кўрсаткичи Хоразм (11,8 фоиз) вилоятида кузатилди.
Шу билан бирга, Сирдарё (6 фоиз), Бухоро (5,7 фоиз) вилоятлари ҳамда Қорақалпоғистон (5,2 фоиз), Жиззах (3,2 фоиз) ва Тошкент (0,1 фоиз) вилоятларида аҳоли жон бошига умумий даромадларнинг реал ўсиши ўртача мамлакат даражасидан паст кўрсаткични ташкил этди.
Қолаверса, Навоий вилоятида (- 0,9 фоиз) аҳоли жон бошига умумий даромадларнинг реал ўсиш суръатлари пасайиш тенденцияси қайд этилди.
Бундан ташқари, аҳолининг умумий даромадлари таркиби таҳлил қилинганда, олинган умумий даромадларнинг:
- 61,6 фоизи меҳнат фаолиятидан олинган даромадлар (ёлланма ва мустақил банд бўлишдан олинган даромадлар);
- 29,8 фоизи бюджет трансферти ва бошқа ўтказмалардан олинган даромадлар;
- 6,3 фоизи шахсий истеъмол учун ўзида ишлаб чиқарилган хизматлардан олинган даромадлар;
- 2,3 фоизи мол-мулкдан олинган даромадлар ҳисобига тўғри келади.
Мазкур кўрсаткич ҳудудлар кесимида кузатилганда, умумий даромадлар таркибида меҳнат фаолиятидан олинган даромадларнинг энг юқори улуши Навоий (77,9 фоиз), Тошкент (73,7 фоиз) ва Жиззах (73,5 фоиз) вилоятларида кузатилди.
Аксинча Самарқанд, Хоразм, Сурхондарё, Фарғона, Наманган, Қорақалпоғистон Республикаси, Қашқадарё ва Андижон вилоятларида ўртача мамлакат даражасидан паст кўрсаткич кузатилди.
Ўз навбатида аҳолининг даромадлари таркиби тармоқ ва соҳалар кесимида таҳлил қилинганда, умумий даромадлар таркибида кичик тадбиркорликдан олинган даромадларнинг улуши мамлакат бўйича 56,9 фоизни, бунда энг юқори улуш Жиззах вилоятида (67,9 фоиз) кузатилди, энг паст улуш эса Қорақалпоғистон Республикасида (50,9 фоиз), Навоий вилояти (49,8 фоиз), Тошкент шаҳрида (47,3 фоиз) қайд этилди.
Қолган ҳудудларда ушбу кўрсаткич Бухоро (62,9 фоиз), Наманган (60,5 фоиз), Хоразм (60,2 фоиз), Андижон (59 фоиз), Қашқадарё (59,6 фоиз), Тошкент (59,5 фоиз), Самарқанд (59,1 фоиз), Сурхондарё (59,1 фоиз), Сирдарё (58,9 фоиз), Фарғона (57,3 фоиз) вилоятларида ташкил этди.
Изоҳ (0)