Килиан Мбаппе ва Эрлинг Ҳоланд трансфер бозорида ҳамон энг қиммат футболчилар рўйхатини бошқариб бормоқда. Сўнгги вақтлардаги ёрқин иштироки ва барқарор ўйини эвазига яна бир қанча футболчилар бозорда қиммат қийматга баҳоланяпти.
Қуйида трансфер қиймати (Transfermarkt маълумотлари бўйича) 100 миллион евро ва ундан ортиқ нархга баҳоланган футболчилар ҳақида гап боради.
Виктор Осимҳен (“Наполи”) — 100 миллион евро
Нигериялик футболчи ўзининг энг яхши мавсумларидан бирини ўтказмоқда. Осимҳен чемпионати жорий мавсумида 21 та гол урди ва А Серия тўпурарлар пойгасида катта фарқ билан олдинда бормоқда. Унинг “Наполи” учун жуда муҳим футболчига айланганини сезиш қийин эмас. У қатнашмаган ўйинда неаполликлар “Милан”га 0:4 ҳисобида мағлуб бўлди.
Федерико Вальверде (“Реал Мадрид”) — 100 миллион евро
Сўнгги йиллардаги барқарор ўйин эвазига уругвайлик ярим ҳимоячи “Реал”нинг асосий қуролларидан бирига айланди. Муҳим ўйинларда Анчелотти ўнг қанот ҳужумини айнан Федега ишониб топшираётгани ҳам футболчи қай даражада муҳимлигини исботлайди. Ярим ҳимоячи лига ушбу мавсумида 7 та гол урди ва 2 та голли узатмани амалга оширди.
Педри (“Барселона”) — 100 миллион евро
Ёш бўлишига қарамасдан Педри Каталония клубининг асосий футболчиларидан бирига айлана олди. Охирги ўйинларда жароҳат сабаб иштирок этолмаётган футболчи “Барселона”нинг дахлсиз ўйинчисига айланди. Ярим ҳимоячи Примера бу мавсумида 21 та ўйинда қатнашиб, 6 та гол урди.
Фил Фоден (“Манчестер Сити”) — 110 миллион евро
“Манчестер Сити”нинг англиялик ярим ҳимоячиси бу мавсумда кам ўйин амалиётига эга бўлмоқда. Шунга қарамай у АПЛнинг ҳам, “Манчестер Сити”нинг ҳам иккинчи энг қиммат футболчиси бўлиб турибди. АПЛ 2022/23 йилги мавсумида футболчи 24 та ўйин ўтказиб, 9 та гол ва 4 та ассист қайд этган.
Букайо Сака (“Арсенал”) — 110 миллион евро
“Арсенал”нинг АПЛ пешқадами бўлиб турганига катта ҳисса қўшган Букайо Сака ҳам Фоден каби 110 миллион еврога баҳоланмоқда. Англиялик футболчининг нархи 2022 йилда катта миқдорга ошди ва бу 2023 йилда ҳам давом этмоқда. Футболчи чемпионат жорий мавсумида 29 та ўйинда иштирок этиб, 12 та гол урди ва 10 та голли узатмани амалга оширди.
Жамол Мусиала (“Бавария”) — 110 миллион евро
Ушбу рўйхатдан “Бавария”нинг ёш юлдузи Жамол Мусиала ҳам ўрин олди. 20 ёшли ярим ҳимоячи мавсумдан мавсумга ёрқин кўринмоқда ва кўпроқ ўйин амалиётига эга бўляпти. Германия терма жамоаси футболчиси 2022/23 йилги мавсумда Бундеслигада 25 та ўйин ўтказди, уларда Мусиала 11 та гол урди 8 та ассист қайд этди.
Винисиус Жуниор (“Реал Мадрид”) — 120 миллион евро
“Реал Мадрид” юлдузи энг қиммат футболчилар рейтингида Беллингҳем билан бирга 3-ўринни эгаллаб турибди. Бразилиялик футболчи сўнгги мавсумларда анча ўсишга эриша олди. Ўтган мавсумдаги муваффақиятли ўйинга қарамай бу мавсумда футболчида омадсиз ўйинлар ҳам йўқ эмас. Ирқчилик ва провокация билан боғлиқ муаммолар ҳам учраб турибди, бироқ бу футболчи иқтодорига қўйилган баҳога таъсир қилаётгани йўқ. Винисиус 2022/23 йилги мавсумда Ла Лигада 25 та ўйинда қатнашиб, 8 та гол урди ва 4 та голга ассистентлик қилди.
Жуд Беллингҳем (“Боруссия Д”) — 120 миллион евро
Топ клублар нишонидан тушмай келаётган Жуд Беллингҳем катта эҳтимол билан ёзда “Боруссия”ни тарк этади. Унга “Реал” ва “Ливерпуль”дан жиддий қизиқиш бор. Футболчи бу мавсумда Дортмунд клуби билан биргаликда Бундеслига ғолиблиги учун кураш олиб бормоқда. У лига 25 ўйинида 4 та гол урди ва 4 та голга ҳаммуаллиф бўлди.
Эрлинг Ҳоланд (“Манчестер Сити”) — 170 миллион евро
“Манчестер Сити” таркибида рекордларни уришда давом этаётган Ҳоланд 170 миллион еврога баҳоланмоқда. Футболчи жароҳат сабаб жамоасининг “Ливерпуль”га қарши кечган охирги ўйинини ўтказиб юборди. Шунга қарамай у АПЛда ўзи иштирок этган 26 ўйинда 28 та гол киритди. Ҳоланднинг ассистлари эса 5 тани ташкил қилади.
Килиан Мбаппе (“ПСЖ”) — 180 миллион евро
Энг қиммат ўйинчилар рейтингида ҳамон Килиан Мбаппе карвонбошилик қилмоқда. Бироқ 2023 йилда Мбаппе ва “ПСЖ”нинг ишлари ортга кетмоқда. Клуб Европа Чемпионлар Лигасида “Бавария”га мағлуб бўлиб, мусобақани тарк этди. Франция чемпионатидаги сўнгги мағлубиятлар эса 1-ўринни хавф остига қўймоқда. Мбаппе Лига 1 ушбу мавсумидаги 24 ўйинда 19 та гол ва 3 та ассист қайд этди.
Изоҳ (0)