Kilian Mbappe va Erling Holand transfer bozorida hamon eng qimmat futbolchilar ro‘yxatini boshqarib bormoqda. So‘nggi vaqtlardagi yorqin ishtiroki va barqaror o‘yini evaziga yana bir qancha futbolchilar bozorda qimmat qiymatga baholanyapti.
Quyida transfer qiymati (Transfermarkt ma’lumotlari bo‘yicha) 100 million yevro va undan ortiq narxga baholangan futbolchilar haqida gap boradi.
Viktor Osimhen (“Napoli”) — 100 million yevro
Nigeriyalik futbolchi o‘zining eng yaxshi mavsumlaridan birini o‘tkazmoqda. Osimhen chempionati joriy mavsumida 21 ta gol urdi va A Seriya to‘purarlar poygasida katta farq bilan oldinda bormoqda. Uning “Napoli” uchun juda muhim futbolchiga aylanganini sezish qiyin emas. U qatnashmagan o‘yinda neapolliklar “Milan”ga 0:4 hisobida mag‘lub bo‘ldi.
Federiko Valverde (“Real Madrid”) — 100 million yevro
So‘nggi yillardagi barqaror o‘yin evaziga urugvaylik yarim himoyachi “Real”ning asosiy qurollaridan biriga aylandi. Muhim o‘yinlarda Anchelotti o‘ng qanot hujumini aynan Fedega ishonib topshirayotgani ham futbolchi qay darajada muhimligini isbotlaydi. Yarim himoyachi liga ushbu mavsumida 7 ta gol urdi va 2 ta golli uzatmani amalga oshirdi.
Pedri (“Barselona”) — 100 million yevro
Yosh bo‘lishiga qaramasdan Pedri Kataloniya klubining asosiy futbolchilaridan biriga aylana oldi. Oxirgi o‘yinlarda jarohat sabab ishtirok etolmayotgan futbolchi “Barselona”ning daxlsiz o‘yinchisiga aylandi. Yarim himoyachi Primera bu mavsumida 21 ta o‘yinda qatnashib, 6 ta gol urdi.
Fil Foden (“Manchester Siti”) — 110 million yevro
“Manchester Siti”ning angliyalik yarim himoyachisi bu mavsumda kam o‘yin amaliyotiga ega bo‘lmoqda. Shunga qaramay u APLning ham, “Manchester Siti”ning ham ikkinchi eng qimmat futbolchisi bo‘lib turibdi. APL 2022/23-yilgi mavsumida futbolchi 24 ta o‘yin o‘tkazib, 9 ta gol va 4 ta assist qayd etgan.
Bukayo Saka (“Arsenal”) — 110 million yevro
“Arsenal”ning APL peshqadami bo‘lib turganiga katta hissa qo‘shgan Bukayo Saka ham Foden kabi 110 million yevroga baholanmoqda. Angliyalik futbolchining narxi 2022-yilda katta miqdorga oshdi va bu 2023-yilda ham davom etmoqda. Futbolchi chempionat joriy mavsumida 29 ta o‘yinda ishtirok etib, 12 ta gol urdi va 10 ta golli uzatmani amalga oshirdi.
Jamol Musiala (“Bavariya”) — 110 million yevro
Ushbu ro‘yxatdan “Bavariya”ning yosh yulduzi Jamol Musiala ham o‘rin oldi. 20 yoshli yarim himoyachi mavsumdan mavsumga yorqin ko‘rinmoqda va ko‘proq o‘yin amaliyotiga ega bo‘lyapti. Germaniya terma jamoasi futbolchisi 2022/23-yilgi mavsumda Bundesligada 25 ta o‘yin o‘tkazdi, ularda Musiala 11 ta gol urdi 8 ta assist qayd etdi.
Vinisius Junior (“Real Madrid”) — 120 million yevro
“Real Madrid” yulduzi eng qimmat futbolchilar reytingida Bellinghem bilan birga 3-o‘rinni egallab turibdi. Braziliyalik futbolchi so‘nggi mavsumlarda ancha o‘sishga erisha oldi. O‘tgan mavsumdagi muvaffaqiyatli o‘yinga qaramay bu mavsumda futbolchida omadsiz o‘yinlar ham yo‘q emas. Irqchilik va provokatsiya bilan bog‘liq muammolar ham uchrab turibdi, biroq bu futbolchi iqtodoriga qo‘yilgan bahoga ta’sir qilayotgani yo‘q. Vinisius 2022/23-yilgi mavsumda La Ligada 25 ta o‘yinda qatnashib, 8 ta gol urdi va 4 ta golga assistentlik qildi.
Jud Bellinghem (“Borussiya D”) — 120 million yevro
Top klublar nishonidan tushmay kelayotgan Jud Bellinghem katta ehtimol bilan yozda “Borussiya”ni tark etadi. Unga “Real” va “Liverpul”dan jiddiy qiziqish bor. Futbolchi bu mavsumda Dortmund klubi bilan birgalikda Bundesliga g‘olibligi uchun kurash olib bormoqda. U liga 25 o‘yinida 4 ta gol urdi va 4 ta golga hammuallif bo‘ldi.
Erling Holand (“Manchester Siti”) — 170 million yevro
“Manchester Siti” tarkibida rekordlarni urishda davom etayotgan Holand 170 million yevroga baholanmoqda. Futbolchi jarohat sabab jamoasining “Liverpul”ga qarshi kechgan oxirgi o‘yinini o‘tkazib yubordi. Shunga qaramay u APLda o‘zi ishtirok etgan 26 o‘yinda 28 ta gol kiritdi. Holandning assistlari esa 5 tani tashkil qiladi.
Kilian Mbappe (“PSJ”) — 180 million yevro
Eng qimmat o‘yinchilar reytingida hamon Kilian Mbappe karvonboshilik qilmoqda. Biroq 2023-yilda Mbappe va “PSJ”ning ishlari ortga ketmoqda. Klub Yevropa Chempionlar Ligasida “Bavariya”ga mag‘lub bo‘lib, musobaqani tark etdi. Fransiya chempionatidagi so‘nggi mag‘lubiyatlar esa 1-o‘rinni xavf ostiga qo‘ymoqda. Mbappe Liga 1 ushbu mavsumidagi 24 o‘yinda 19 ta gol va 3 ta assist qayd etdi.
Izoh (0)