Украинанинг давлат ва давлат томонидан кафолатланган қарзлари ҳажми январь ойида 185,35 миллиард гривнага (5,06 миллиард доллар) ошиб, 4 258,20 миллиард гривнага (116,44 миллиард доллар) етди. Бу ҳақда Украина Молия вазирлиги сайтида хабар берилди.
Қайд этилишича, қарзнинг 64,95 фоизи хорижликларга, 35,05 фоизи Украина фуқароларига тўғри келади.
2022 йил якуни бўйича Украинанинг давлат қарзи 13,7 фоизга (13,42 миллиард доллар) ўсди ва 31 декабрь ҳолатига кўра 111,38 миллиард долларни ташкил қилди.
Олий Раданинг Молия бўйича қўмитаси маълумотларига кўра, жорий йил бюджетида давлат қарзининг максимал миқдорини 172,7 миллиард долларгача ошириш кўзда тутилган.
Бу 2024 йил учун ялпи ички маҳсулотнинг прогноз даражасининг 102,3 фоизини ташкил этади. Украинанинг 2023 йилги давлат бюджетида 38 миллиард доллар дефицит кўзда тутилган.
Аввалроқ Украина собиқ бош вазири Николай Азаров мамлакатнинг Ғарб кредиторлари олдидаги қарзи 2023 йилда мамлакат ялпи ички маҳсулотидан бир ярим баравар кўп бўлиши мумкинлигини айтганди.
Азаровнинг таъкидлашича, 2023 йилда Украина ялпи ички маҳсулоти пасайишда давом этади, давлат қарзи эса 107 миллиард доллардан 200 миллиард долларгача ошиши мумкин.
Россия ва Украина ўртасида уруш бошлангандан кейин Украина АҚШ ва Европа Иттифоқидан қарз жалб қилишни кўпайтирди. Бунга мамлакатнинг уруш оқибатида қийин иқтисодий ҳолатда қолиб кетгани сабаб бўлган.
Изоҳ (0)