“Раҳбар бўлишимни мендан кўра кўпроқ исташди” — Азим Муллахонов ижтимоий тармоқлардаги танқидларга ўз муносабатини билдирди

Ўзбекистонда хизмат кўрсатган артист Азим Муллахоновнинг Муқимий номидаги мусиқали комедия театрига раҳбар этиб тайинлангани кўплаб муҳокамаларга сабаб бўлганди. “Дарё” мухбири Наргиза Муродова хонанда билан суҳбатда бўлиб, театрдаги фаолияти ва унга нисбатан билдирилган танқидларга қандай муносабатда эканини айтди.

— Раҳбар лавозимларига кўп бор таклиф этишган. Аммо бу гал “Болалигингиз шу даргоҳда ўтган, бу жамоа билан аввалдан яхшисиз”, дейишгани учун йўқ деёлмадим. Театрдаги муҳит ва оркестр билан ишлашни жуда яхши тушунаман. Чунки ўзим ҳам театрда Ўзбекистон халқ артисти Наби Халилов дирижорлигидаги оркестда созанда бўлиб ишлаганман, — дейди Азим Муллахонов.

Азиз Муллахонов раҳбар бўлишни истадими ёки бошқалар исташдими? Хонанда бу саволга қуйидагича жавоб берди.

— Раҳбар бўлишимни кўпроқ исташди. Шу ишни уддалайман, онамнинг ҳам руҳи шод бўлади, деб ваъда бердим. Табиатан ваъда берган ишимнинг уддасидан чиқишга одатланганман. Айримлар ўйлагандек, театрдан хабари йўқ инсон эмасман. Аввалги театр ва рассомчилик институтининг режиссёрлик бўлимида таҳсил олганман.
Олдиндан мақтаниш ниятим йўқ, аммо имкон қадар театр ривожига ҳисса қўшишга ҳаракат қиламан, — дейди Азим Муллахонов.

Аввалроқ “Миллион” кулги жамоаси сардори, бошловчи Даврон Кабулов Ўзбекистонда хизмат кўрсатган артист Азим Муллахоновнинг Муқимий театрига директор бўлганини танқид остига олган эди.