2023 йилдан Ўзбекистон ҳудудларининг муҳандислик-коммуникация ва ижтимоий инфратузилма тизими ҳамда хизмат кўрсатиш ва сервис соҳалари ривожлантирилади. Бу жамоатчилик муҳокамасига қўйилган 2023 йилги давлат дастури лойиҳасининг 34-мақсадида кўзда тутилган.
Қайд этилишича, республикадаги кўп квартирали уйларнинг марказлашган иссиқлик таъминоти тизимини ривожлантириш, энергия тежамкор технологияларни кенг жорий этиш ва энергия самарадорлигини ошириш мақсад қилинган. Шу сабабли:
- барча шаҳар ва туманлардаги марказий кўчалар, чорраҳалар ва аҳоли гавжум масканларда замонавий санитария-гигиена шохобчалари жойлаштириладиган жойлар аниқланади;
- замонавий санитария-гигиена шохобчалари тармоғини ташкил этиш ишларига маҳаллий ва хорижий тадбиркорлик субъектлари кенг жалб қилинади;
- мазкур ер майдонларини тадбиркорлик субъектларига ажратиш ҳамда уларнинг инфратузилма тармоқларига (сув, электр энергияси, оқава тармоғига) уланишига кўмаклашилади.
Бундан ташқари, республика аҳолисини марказлашган ичимлик суви билан таъминлаш даражаси 77 фоизга етказилади. Йилдан йилга ўтувчи 54 та ва янгидан бошланувчи 17 та объектларда 105 та иншоотлар ва 1,4 минг километр ичимлик сув ва оқова сув тармоқлари қурилади.
Топшириқлар ижроси 2023 йил давомида амалга оширилади. Харажатлар республика бюджети маблағлари ҳисобидан қопланади. Қурилиш ва уй-жой коммунал хўжалиги вазирлиги, Иқтисодиёт ва молия вазирлиги ижро учун масъул этиб белгиланди.
Изоҳ (0)