“Немис танклари таҳдид қилмоқда”: Путин Германия Украинага танклар юборишига муносабат билдирди (видео) 

Россия президенти Владимир Путин Сталинград жангининг 80 йиллигига бағишланган концертдаги чиқишида Ғарб давлатлари Украинага танклар юборишига муносабат билдирди. Бу ҳақда “РБК” хабар берди.

Путин саксон йил аввал содир бўлган воқеаларга ўхшаб, Россияга яна немис танклари таҳдид солаётганини айтди.

“Жанг майдонида Россияни мағлуб этишни кутаётганлар, Россия билан замонавий уруш улар учун бутунлай бошқача бўлишини тушунмайди. Биз танкларимизни уларнинг чегарасига юбормаймиз. Жавоб берадиган нарсамиз бор. Зирҳли транспорт воситаларидан фойдаланиш билан бу иш тугамайди. Буни ҳамма тушуниши керак”, — деди президент.

Путиннинг Россия яна бир бор Ғарбнинг коллектив тажовузини қайтаришга мажбурлигини айтди. 

“Ақл бовар қилмайди, аммо бу ҳақиқат: бизга яна бортида хочлар бўлган Германиянинг Leopard танклари таҳдид қилмоқда”, — деди у. 

Шунингдек, сиёсатчи Россиянинг бутун дунёда, жумладан, Шимолий Америка ва Европада ҳамон дўстлари кўплигини таъкидлади.

25 январь куни Германия Украинага 14 та Leopard 2 танки беришини, шунингдек, бошқа давлатларга ҳам немис танкларини Киевга етказишга рухсат берганини таъкидлади. Шу куни АҚШ президенти Жо Байден Украинага Abrams танкларини етказиб берилишини эълон қилди.

Мавзуга доир: “10 та танк нима бўлади?” Қайси давлатлар Украинани танклар билан таъминлайди?