Ўз соғлиғига бепарво муносабатда бўлиш кун келиб белнинг пастки қисмида тўсатдан пайдо бўладиган кучли оғриқни келтириб чиқаради. Буйракларини шамоллатиб қўйган киши бундай нохуш ҳолатнинг такрорланишини истамайди. Бунга йўл қўймаслик учун нималарни билиш керак? Буйраклар яллиғланишини қандай даволаш мумкин?
Буйрак шамоллаши белгилари
Оқибатлари ҳақида ўйламасдан одамлар шамоллашга етарлича эътибор қаратмайдилар, иссиқ кийинмайдилар. Тошли жойлар, ўт-ўланлар, темир-бетон ўриндиқлар аксар ёшларнинг ўзаро йиғилиш жойига айланган. Буларнинг барчаси буйракларда яллиғланиш жараёнининг ривожланишига олиб келади. Бу ҳам секин, ҳам тез бўлиши мумкин.
Биринчиси, яъни буйракнинг секин-аста яллиғланиши анча хавфлидир. Чунки бу жараён узоқ вақт давомида сезилмайди, аммо жиддий оқибатлар билан якун топади. Иккинчиси ўзини тўсатдан намоён қилади. Қуйидаги белгиларни бошдан кечирган бўлсангиз, буйракларингизни шамоллатиб қўйган бўлишингиз мумкин:
- Тана ҳароратининг 39 градусга кескин кўтарилиши;
- Кучли совуқ тернинг чиқиши;
- Бош оғриғининг кучайиши;
- Бел соҳасида ноқулайлик;
- Кўнгил айниши ва қайт қилиш;
- Умумий беҳоллик;
- Чанқоқ;
- Пешоб вақтида безовталаниш ва оғриқ;
- Пешобнинг лойқаланиши, унда қон ва қумнинг пайдо бўлиши.
Бундай белгилар пайдо бўлганда энг катта хато — бу ўз-ўзини даволашга уринишдир. Бу соғлиққа зарар етказиши ва касалликнинг сурункали шаклга ўтишига олиб келиши мумкин. Беморга қандай ёрдам бериш керак?
Буйрак шамоллаганда нима қилиш керак?
Буйраклар шамоллаганда, уролог ёки буйрак касалликлари бўйича мутахассис билан тиббий мулоқотдан қочиб бўлмайди. Яллиғланиш сабабини аниқлаш ва зарар майдонини аниқлаш ўта муҳимдир. Даволаниш даврининг давомийлиги тўғри ташхисга боғлиқ бўлади. Касалликни эрта аниқлаш муваффақиятли даволанишнинг калитидир.
Шунга ўхшаш аломатлар сезилганда хасталик бўйича маълум дори-дармонларни қабул қилган дўстлар, таниш-билишлар ва қариндошларнинг маслаҳатига таянманг.
Омадингиз келиб ташхислар бир-бирига мутаносиб келса ҳам, ҳар бир организм шу қадар индивидуалки, кимдир учун самарали бўлган дори бошқасининг соғлиғига салбий таъсир кўрсатиши мумкин.
Буйраклар шамоллаши тўсатдан аниқланиб қолса, нима қилиш кераклиги ҳақидаги саволга жавоб аниқ. Сийдик ва қонни тўлиқ текшириш, лозим топилса, зарарланган органни рентген қилдириш ёки ултратовуш орқали диагностика қилдириш зарур.
Шунга ўхшаш муаммоси бор беморларга шифокор одатда қуйидагиларни тавсия қилади:
- Шифобахш парҳез;
- Дам олиш ва жисмоний фаолиятдан бир муддат чекиниш;
- Совуқ қотишдан сақланиш;
- Соғайтирувчи ванналар қабул қилиш.
Мутахассис назорати остида касалликни тез фурсатда енгиб ўтиш мумкин. Асосийси, муаммони жиддий қабул қилиб, даволаш чораларини ўтказиб юбормаслик зарур.
Мавзуга доир:
Изоҳ (1)
Икки тамоним га огрик сизяпман ерталаб турсам кузларни тайм шишгандай буляпти