Швейцария ҳукумати Қирғизистонда табиий офатларга чидамли инфратузилмани яратиш учун 9 миллион доллар ажратади. Бу ҳақда Швейцариянинг Қирғизистондаги элчихонаси матбуот хизмати хабар берди.
Хабарга кўра, маблағлар Ўш, Боткен ва Норин вилоятларидаги лойиҳаларни молиялаштиришга йўналтирилади. Улар табиий офатларни: қурғоқчилик, сел, тошқин ва бошқаларни бошқариш, уларга қарши курашишда тизимли ёндашувни ишлаб чиқишни таъминлаши керак. Лойиҳалар натижасида 250 мингта энг заиф уй хўжаликлари ишончли иқлим прогнозларини олади ва юзага келиши мумкин бўлган офатларга олдиндан тайёргарлик кўради.
“Швейцария ҳукумати Жаҳон озиқ-овқат дастури доирасида энг заиф қишлоқ жамоатларининг иқлим ўзгариши ва табиий офатлар хавфига чидамлилигини ошириш учун 9 миллион доллардан ортиқ маблағ ажратмоқда. Ушбу компонент Жаҳон озиқ-овқат дастури томонидан Қирғизистон республикаси Фавқулодда вазиятлар вазирлиги билан ҳамкорликда амалга оширилмоқда”, — дейилади элчихона хабарида.
Мазкур лойиҳаларни молиялаштириш бўйича келишув Швейцариянинг Қирғизистон республикасидаги элчиси Оливье Бангертер ва БМТ Жаҳон озиқ-овқат дастури вакили ва мамлакат директори Кожиро Накай томонидан имзоланган.
Келишув доирасидаги дастурни амалга ошириш келгуси беш йилга мўлжалланган.
Охирги йилларда Қирғизистон ҳудудида бир қанча табиий офатлар қайд этилиб, инсонлар қурбон бўлди. Кўчкилар туфайли кўплаб турар жой бинолари ва аҳоли пунктлари инфратузилмасига шикаст етди. Тошқин ва селлар ҳар йили юзлаб уйларни ювиб кетиб, ўнлаб одамлар ҳалок бўлмоқда.
Изоҳ (0)