Меҳриддин Хайриддинов бош вазир маслаҳатчиси лавозимидан озод қилинди

Меҳриддин Хайриддинов бош вазир маслаҳатчиси — Хорижда вақтинчалик меҳнат фаолиятини амалга ошираётган Ўзбекистон фуқаролари ҳуқуқларини ҳимоя қилиш ва қўллаб-қувватлаш масалалари департаменти мудири лавозимидан озод этилди.

У 2020 йил 17 август куни ушбу лавозимга тайинланганди. Мазкур лавозимга тайинлангунига қадар Меҳриддин Хайриддинов Ўзбекистоннинг Москвадаги элчихонасида бош консул лавозимида ишлаб келган. Бош вазир маслаҳатчиси лавозимини 2019 йил август ойидан буён Комил Рашидов эгаллаб келаётганди.

Меҳриддин Хайриддинов 1977 йилда Бухоро вилоятида туғилган. У 1999 йилда Жаҳон иқтисодиёти ва дипломатияси университетини тамомлаган. Ғиждувон туманидаги 46-мактабда 2000—2001 йилларда ўқитувчи бўлиб ишлаган. 2001—2008 йилларда Меҳриддин Хайриддинов Навоий кон-металлургия комбинатида 1, 2, 3-тоифа муҳандиси, ташқи иқтисодий алоқалар бўлими бошлиғи ўринбосари лавозимларида меҳнат қилган.

Меҳриддин Хайриддинов Ташқи иқтисодий алоқалар, инвестициялар ва савдо вазирлигида 2008—2010 йилларда етакчи мутахассис, 2010—2014 йилларда Ўзбекистоннинг Қирғизистондаги элчихонасининг 1-котиби, 2014—2017 йилларда Ўзбекистон Ташқи ишлар вазирлигининг Консуллик бошқармаси бошлиғи лавозимларида ишлаган, сўнгра 2017—2018 йилларда Ўзбекистоннинг Санкт-Петербург шаҳридаги бош консули бўлган.