Ўзбекистонлик тадбиркор, Амирсой тоғ-чанғи дам олиш комплекси раҳбари Равшан Убайдуллаев Швейцариянинг Давос шаҳрида бўлиб ўтадиган анъанавий Бутунжаҳон иқтисодий форумида (World Economic Forum 2023) иштирок этди.
Таъкидланишича, бу катта форум доирасида ўзбекистонлик тадбиркорнинг илк иштироки бўлди. Шу пайтгача мазкур нуфузли тадбирда Ўзбекистон вакили иштирок этмаганди. Равшан Убайдуллаев форум иштирокчилари учун ўзи бошчилик қилаётган Амирсой тоғ-чанғи курорт зонаси бўйича тақдимот ўтказди.
Равшан Убайдуллаев ўз чиқишида Амирсой ҳудудининг яратилиши, уч йил давомида ушбу лойиҳанинг муваффақияти ҳақида сўзлаб берди. Ўзбекистонда чанғи комплексларини ташкил этиш, бу борадаги туризмни ривожлантиришнинг аҳамияти муҳим эканини таъкидлаб, Ўзбекистон президенти Шавкат Мирзиёевнинг шахсан ўзи бу каби лойиҳаларнинг бош ташаббускори эканини алоҳида қайд этиб ўтди. Жумладан, Амирсой дам олиш зонасини муваффақиятларида президент Шавкат Мирзиёев шахсан ўзи қўллаб-қувватлагани ҳам муҳим аҳамият касб этганини алоҳида қайд этди.
Маълумот учун, Бутунжаҳон иқтисодий форуми ҳар йили ўтказилади. Швейцариянинг Давос курорти мезбонлик қиладиган ушбу глобал миқёсдаги тадбир бу сафар 16—20 январь кунлари бўлиб ўтди. Форумда дунёнинг энг кўзга кўринган иқтисодчилари, бизнес вакиллари, тадбиркорлари иштирок этади.
Ушбу форум давлат ва хусусий шерикчилик тамойиллари асосида фаолият юритади. Форумга 1971 йилда асос солинган бўлиб, унинг штаб квартираси Швейцариянинг Женева шаҳрида жойлашган.
Изоҳ (0)