Бугун ОКМК ахборот хизмати томонидан «Олмалиқ кон-металлургия комбинатида йил дастури ижроси» мавзусида пресс-тур ташкил этилди
Нодир металлар ва қаттиқ қотишмалар илмий ишлаб чиқариш бирлашмасида ўтказилган пресс турда Би-Би-Си телерадиокомпанияси (Буюк Британия), Atameken Business Медиа Holding телеканали, «Хабар» агентилиги (Қозоғистон), КНИА «Кабар» агентлиги (Қирғизистон), «Сзинсзи Жибао» газетаси, «Sinxua» агентлиги (Хитой), «Спутник» ҳамда «Фергана»(Россия) ахборот агентликлари вакиллари ва юртимиз ОАВлари иштирок этишди.
Дастлаб, ОАВ вакиллари учун бирлашма фаолияти ва 2022 йилда амалга оширилган ишлар юзасидан тақдимот ўтказилди.
Бирлашма ОКМК таркибидаги энг муҳим таркибий бўлинма саналиб, унда молибден ва волфрам метали, тузлари, молибден ҳамда волфрам штабиклари ва брикетлари, волфрам карбиди, оловбардош керамик маҳсулотлар, қаттиқ қотишмалардан тайёрланган маҳсулотлар ишлаб чиқарилади,- дейди бирлашма директори Илҳом Асадов. - Корхонада ишлаб чиқарилган маҳсулотлар асосан экспортга йўналтирилган. Бирлашма томонидан 2022 йил январь декабрь ҳолатига кўра, 33,3 млн долларлик маҳсулот экспорт қилинган. Ички бозорга эса 29,18 млрд сўмлик маҳсулот етказиб берилган. Комбинат таркибий бўлинмаларига эса 1,09 млрд сўмлик маҳсулот юборилган. 2022—2026 йилларда бирлашмани ривожлантириш дастурига кўра, умумий қиймати 161,05 млн доллар бўлган 34 та лойиҳа амалга оширилиши белгиланган.
Дастурга кўра, 2022 йилда Молибден ишлаб чиқаришни ошириш, Нодир металлардан тайёр маҳсулотлар ишлаб чиқариш, емирилишга бардошли қопламалар қўллаш технологияларини жорий этиш, карбид чиқиндиларидан кобалт оксиди олиш, рух ишлаб чиқаришининг қайта ишланувчи эритмаларидан индий ажратиб олиш технологияларини ишлаб чиқиш ва жорий этиш каби лойиҳалар амалга оширилди. Мазкур лойиҳалар амалга оширилиши натижасида 135 та янги иш ўрни яратилди. 20 дан ортиқ маҳсулот турларини ишлаб чиқариш ўзлаштирилди.
2022 йил бирлашма меҳнат жамоаси учун самарали йил бўлди. Корхона томонидан 421,3 млрд сўмлик саноат маҳсулотлари ишлаб чиқарилиб, режа 180,2 фоизга муддатидан аввал бажарилди. Маҳсулотлар экспортида 33,33 млн долларлик натижа қайд этилиб, режа 284,9 фоизга уддаланди. Маҳаллийлаштириш дастури асосида 42 та лойиҳа бўйича 110,3 млрд сўмлик маҳсулот тайёрланган. Ишлаб чиқаришдан олинган соф фойда эса 180,2 млрд сўмни ташкил этмоқда. Режа бажарилиши эса 4,9 бараварни ташкил этган.
Шундан сўнг, журналистларга ўзбек-корейс илмий технологик маркази фаолияти таништирилди.
- Бирлашма қошида 2019 йили ўзбек-корейс илмий техник марказ фаолияти йўлга қўйилиб, марказ мутахассислари томонидан саноат тажриба асосида самарали илмий изланишлар олиб борилмоқда, - дейди Инновацион технологияларни ишлаб чиқиш ва жорий этиш маркази директори, профессор, Ўзбекистон-Корея дастурининг координатори Амир Обидов. -Жорий йилнинг 25 декабрь куни Корея Миллий Ассамблеяси томонидан Олмалиқ кон-металлургия комбинатига 15 млрд вон (12 млн АҚШ доллари атрофида) миқдоридаги грант ажратилиши бўйича қарор қабул қилинди.
Мазкур грант маблағлари доирасида Нодир металлар ва қаттиқ қотишмалар ишлаб чиқариш бирлашмасининг ўзбек-корейс илмий технологик маркази қошида саноат тажриба цехи ташкил этилади. Ушбу цехга замонавий лаборатория жиҳозлари ҳамда технологик ускуналари олиб келинади. Янги цехда Илмий ишланмаларни тижоратлаштириш дастурга асосланган ҳолда ишлаб чиқаришни модернизациялаш, янги технологияларни жалб қилиш бўйича тадқиқот ишлари олиб борилади.
Лойиҳа 2023-2027 йилларда амалга оширилиши кўзда тутилган. Лойиҳа доирасида Бирлашма таркибидаги Ўзбек-Корейс илмий технологик марказидаги саноат тажриба цехига пилот ускуналар етказиб берилиб, қўшма илмий тадқиқот дастури амалга оширилади. Ўзбекистонда Корея томонидан Нодир металлар ва мис саноати экспертлари иш олиб боради ва комбинат муҳандислари Кореяда амалиёт ўташади.
Пресс тур давомида ОАВ вакиллари бирлашманинг техник кутубхонаси, Композит материаллар ва қаттиқ қотишмалари ишлаб чиқариш, Молибден ва волфрам ишлаб чиқариш бўйича пирометаллургия ҳамда Асбобсозлик ва технологик ускуналар ишлаб чиқариш цехларида бўлишиб, технологик жараёнлар билан танишдилар.
Тадбирда комбинат олимлари ҳамда бирлашма, марказ мутахассисларининг самарали илмий тадқиқот ишлари натижасида 2021 йилда рений металли, 2022 йилда эса молибден металини соф ҳолатда олинишига эришилгани, шунингдек, жорий йилнинг август ойида юқори даражада мустаҳкамлик ва эгилувчанликка эга никел асосли янги суперқотишма олингани маълум қилинди.
Ушбу қотишмадан узоқ ишлайдиган, масалан, автомобилсозлик, ички ёнув двигателлари, юқори иссиқликда ишловчи қурилмалар, нефть-газ соҳасида, аэрокосмик ишлаб чиқаришда фойдаланилади. Яна бир янги маҳсулот аммоний октамолибдат бўлиб, у тутунни камайтирувчи ва оловни сўндириш хусусиятига эга. Ушбу модда барча пластик маҳсулот (поливинилхлорид )ларига қўшилганда биринча навбатда ёнғинни ўчириш хусусиятга эга. Энг афзаллик жиҳати, пластик қурилиш материалига қўшилганда унинг ёнувчанлигини тўхтатиши билан аҳамиятли.
Пресс-тур иштирокчилари ўз таассуротларини билдиришди.
Маржан Жумабай, Atameken Business Медиа Holding телеканали мухбири: - Пресс-тур давомида комбинат ҳақида кўп маълумотга эга бўлдим. Айниқса, бирлашмада амалга оширилаётган ишлар менда катта таассурот қолдирди. Бирлашмада илм-фан ютуқларидан саноат соҳасида самарали натижаларга эришилаётганлигининг гувоҳга айландим. Комбинат маҳсулотларининг Қозоғистон давлатига экспорт қилиниши ҳам менга қизиқ. Ўйлайманки тадбир давомида комбинатни ўзимда кашф этдим.
Нигора Элмуродова, «Севимли ТВ» телеканали мухбири: Комбинатда иккинчи маротаба бўлишим. Аввалги тадбирда Қалмоққир ва «Ёшлик-1» конларидаги жараёнлар ҳам мен учун қизиқ бўлганди. Бирлашмадаги ишлаб чиқариш жараёнлари ҳам катта таассурот қолдирди. Айниқса, молибдендан инсон соч толасидан ҳам ингичка бўлган сим олиниши, қаттиқ қотишмалардан юқори қийматли маҳсулотларнинг тайёрланиш жараёни барчага қизиқ. Тайёр маҳсулотларнинг олиниши замирида албатта машаққатли меҳнат ётади. Буни Уларнинг кичик деталларигача томошбинга етказиб бера олишимиз керак. Чунки биз одатда тайёр маҳсулотларни кўрамиз, айнан бу жараёнлар ортида оғир меҳнат ётганини доим билавермаймиз. Ўйлайманки, пресс турдан олинган таассуротлар орқали комбинатда ишлаётган ишчи-ходимларнинг залворли меҳнатини кўрсатиб берамиз. Яна мени ҳайрон қолдирган жиҳат комбинатда ўз ишининг усталари, етук олимлар меҳнат қилаётгани ҳам комбинатнинг жаҳонда эътироф этилишини таъминлайди.
Тадбирда ОАВ вакиллари мутахассислардан ўзларини қизиқтирган саволларга батафсил жавоб олишди.
ОКМК ахборот хизмати
Изоҳ (0)