2023 йилда экспорт ҳажми тарихимизда илк бор 23 миллиард доллардан ортади

Айни вақтда Ўзбекистон президенти Шавкат Мирзиёев Олий Мажлисга мурожаатнома йўлламоқда. Бу ҳақда «Дарё» мухбири хабар берди.

Давлат раҳбарининг сўзларига кўра, 2023 йилда тайёр маҳсулотлар экспортини қўшимча 4 миллиард долларга ошириш асосий мақсад бўлади.

«Бу йил бошланган «Янги Ўзбекистон – рақобатбардош маҳсулотлар юрти» дастури ўз самарасини бермоқда. Бир йилнинг ўзида 2 мингга яқин тадбиркорлар илк бор ташқи бозорларга чиқди. Келаси йилда ҳам, экспорт қилувчиларга транспорт ва бошқа харажатларини компенсация қилиш давом эттирилади», — деди президент.

Шавкат Мирзиёев Европа бозорларига текстил, электротехника, чарм-пойабзал ва бошқа тайёр маҳсулотлар экспортини камида 2 баробар ошириш кераклигини айтди.

«Маҳсулотлар экспорти бўйича ҳозирги 9 та босқичли божхона расмийлаштируви 3 баробарга қисқаради. Жаҳон савдо ташкилотига аъзо бўлиш бўйича асосий музокараларни якунлаб, ички қонунчиликни мослаштириш, янги стандартларни жорий этиш ишларини жадаллаштирамиз. Умуман, 2023 йилда экспорт ҳажми тарихимизда илк бор 23 миллиард доллардан ортади (2018 йилда 14 миллиард доллар бўлган)», — деди Шавкат Мирзиёев.

Малумот учун, экспортчи корхоналарни очиқ танлов орқали саралаб, уларни етакчи экспортёрларга айлантириш ва ҳар томонлама қўллаб-қувватлаш бўйича «Янги Ўзбекистон – рақобатбардош маҳсулотлар юрти» дастури 1 ноябрдан бошлаб амалга оширилмоқда. Ушбу дастур президентнинг «Тадбиркорлик субъектларининг экспорт салоҳиятини янада кенгайтириш чора-тадбирлари тўғрисида»ги фармони билан белгиланган.

Мавзуга доир: Ўзбекистоннинг ЖСТга аъзо бўлиш жараёни янада жадаллаштирилади