Шавкат Мирзиёев раислигида тадбиркорлик ва саноатни ривожлантириш, аҳоли бандлигини таъминлаш чора-тадбирлари юзасидан ўтказилган видеоселектор йиғилишида яратилган имкониятларга қарамасдан, айрим ҳудудларда аҳоли бандлигини таъминлаш кўрсаткичлари яхши эмаслиги кўрсатиб ўтилди.
Таъкидланишича, 2022 йил давомида доимий бандлар сони Китоб, Косон, Мирзаобод, Нарпай, Нишон, Фурқат туманларида камайган. Тегишли вилоят ҳокимларига уч кун муддатда ушбу туман ҳокимларига нисбатан чора бўйича таклиф бериш топширилди.
Хусусий секторда фаолият кўрсатаётган 232 мингта корхонада ишчилар сони бор-йўғи 1 нафарни ташкил қилади. Бу дегани улар ҳалиям «яширин иқтисодиёт» шароитида ишлаб, «конверт»да ойлик тўлаб келмоқда.
Бундай ҳолат 47 та туманда энг юқори. Мисол учун,
- Нукус, Зарбдор, Миришкор, Музработ, Каттақўрғон туманларида 80 фоиз;
- Жондор, Косон, Ургут, Пастдарғом, Учқўрғонда 75 фоиз;
- Гулистон, Наманган, Қўшкўпир туманларида 70 фоиз корхоналарда 1 та иш ўрни кўрсатилган.
Лекин бу туманлардаги корхоналар адолатли солиқ тўлаш ва давлат билан ҳамкорликка ўта олмаяпти. Шунингдек, 25 ёшгача бўлганларни ишга қабул қилганда тадбиркорлар 6 ой давомида ижтимоий солиқдан озод қилинди.
«Бу имтиёзлар айнан туманларда тадбиркорликни ривожлантиришга туртки беришга қаратилган-ку! Лекин ушбу туманларнинг ҳокими, биринчи ўринбосари ва солиқ раҳбари нима билан банд? Нима учун, 70—80 фоиз корхоналарида 1 нафардан ходим ишлаётгани билан бирор марта қизиқиб кўрмаган?» — сўради давлат раҳбари.
Вилоят ҳокимларига масъул идоралар билан биргаликда бир ой муддатда бу 47 та туманда сўров ўтказиб, ҳар бирига алоҳида ёндашувларни ишлаб чиқиш топширилди.
Изоҳ (0)