Энергетика вазирлиги аҳолига кунлик етказиб берилаётган электр ва газ миқдорини маълум қилди

Кеча, 14 декабрь куни Ўзбекистон электр станциялари орқали 226,2 миллион кВт/соат электр энергияси ишлаб чиқарилган. Шундан истеъмолчиларга 224,2 миллион кВт/соат электр энергияси етказиб берилди. Бу ҳақда Энергетика вазирлиги хабар берди.

Вазирликка кўра, кеча газ таъминоти корхоналари истеъмолчиларга 151 миллион куб метр табиий газ етказиб берилган. Шундан аҳолига 73 миллион куб метр, юридик корхоналарга 78 миллион куб метр газ тақсимланган. Шунингдек, сутка давомида истеъмолчиларга 1 минг 900 тонна суюлтирилган газ, 10 минг 600 тонна маҳаллий кўмир етказиб берилган.

«Корхоналарда қазиш ва ишлаб чиқариш ишлари ўрнатилган тартибда бажарилмоқда. Барча корхоналарда штаблар тузилиб, 24 соатлик навбатчилик ташкил қилинган. Республиканинг айрим ҳудудларида электр энергияси таъминотида чекловлар (1,5 – 2 соатгача) киритилди.

Таъминотдаги узилишлар бўйича истеъмолчилардан 479 та мурожаат келиб тушди. Мурожаатлар асосида электр қурилмаларида юзага келган носозликлар махсус бригадалар томонидан бартараф этилди.

Шу билан бирга, газ қувурларида босимнинг меъёрдан пастлиги сабабли Тошкент, Фарғона, Андижон, Наманган, Самарқанд, Сурхондарё вилоятлари ва Тошкент шаҳрининг айрим ҳудудларида табиий газ етиб боришида узилишлар кузатилган», – дейилади ахборотда.

Энергетика вазирлигининг «Дарё»га маълум қилишича, ҳозирги ҳолатда истеъмолчиларга электр ва газ етказиб беришда 8 фоиз тақчиллик мавжуд.