«Бавария» мавсум охиригача сафдан чиққан Нойер ўрнига ЖЧ—2022 кашфиётларидан бирини олиб келмоқчи

Хорватия терма жамоаси дарвозабони Доминик Ливакович фаолиятини «Бавария»да давом эттириши мумкин.

Мюнхенликлар клуби «Динамо Загреб» дарвозабонининг вакиллари билан музокараларни бошлади. Немис клуби Ливаковичга жароҳат олган Мануэль Нойернинг ўринбосари сифатида қарамоқда.

Нойер чанғида учиш вақтида йиқилиб, оёғини синдириб олди ва мавсум охиригача сафдан чиқди.

Айни вақтда «Бавария» дарвозабон излаш билан банд ва Ливакович асосий вариантлардан бири бўлиб турибди.

27 ёшли посбон Хорватия чемпионатида жорий мавсум 16 ўйин ўтказиб, ўз дарвозасидан 17 та тўп олиб чиқди. ЖЧ—2022 даги 5 ўйинда эса учта тўп ўтказиб юборди.

Аввалроқ Мюнхен клуби «Монако»га ижарага берилган Александр Нюбелни қайтариб олиб келиши ёки «ПСЖ» посбони Кейлор Навасни сотиб олиши мумкинлиги айтилганди. Бироқ Нюбелни қайтариб олиш учун компенсация тўлаш керак бўлади. «ПСЖ» эса ЕЧЛ 1/8 финалидаги рақиби таркибини кучайтириб қўймаслик учун Навасни сотишни истамаяпти.