Андижон вилоятининг Қўрғонтепа тумани ҳокимлигидаги безакли чироқлар жамоатчилик муҳокамасига сабаб бўлмоқда. Ҳокимлик мазкур ҳолатга изоҳ берар экан, буни аҳолига байрам кайфиятини улашиш учун қилинган иш деди.
Дастуримизни Андижон вилояти янгиликлари билан давом эттирамиз. Бу янгилик, эможиларга қараганда, одамларга ёқяпти. Маълумот учун, Тошкентдаги президент трассасига илинган шундай безакли чироқлар энергия инқирози бошланганидан бери ўчиқ, — дейди бу ҳақда фикр билдирган журналист ва блогер Муҳрим Аъзамхўжаев.
Блогер Нозим Сафари эса буни «Исрофгарчиликнинг олий даражаси», деди. Шунингдек, «Кўп эҳтимол билан туманнинг аксарият хонадонларида айни вақтда ‘свет’ йўқ. Ҳокимлик эса қимматбаҳо ва кўп энергия ‘ейдиган’ чироқлар билан безатилмоқда. Қойил қолмай иложи йўқ бу ‘каллали раҳбарлар'га. Инсоф берсин сизларга», — дейди у.
Ҳокимликнинг бу ҳаракатига муносабат билдирган қўрғонтепаликлардан бири «Болаларим дарс қилиши керак, бизникида ‘свет’ йўқ, зато ҳокимиятда бор», деса, яна бири «Одамларнинг уйларида ‘свет’ йўқ, Сизлар ҳокимиятни безатиб ўтирибсизларми? Уялмайсизларми?», дейди. Яна бир ижтимоий тармоқ фойдаланувчиси эса «электр ва пул увол», дейди.
Ушбу декоратив чироқлар яқинлашиб келаётган Янги йил байрами муносабати билан аҳолининг байрамона кайфиятда бўлишини мақсад қилади. Ҳокимлик биносидаги чироқларни ўрнатиш олдидан мутахассислар энергия тежамкорлиги масаласига эътибор қаратган. Электр сарфи жиҳатидан мазкур декорация 250 ватт қувват сарфлайди ва бу оддий хонадондаги битта чироқнинг сарфидан камроқ. Шу тақдирда ҳам бу чироқлар соат 18:00 дан 21:00 гача ёниб туриши режалаштирилган бўлиб, аҳолининг оилавий сайр вақтига мўлжалланган. Бошқа вақтларда декоратив чироқларни ёқиш режалаштирилмаган, — дейди ҳокимлик масъуллари мазкур муҳокамаларга жавоб берар экан.
Бу борада ҳокимлик ишини оқлаганлар ҳам бор. Улардан бири «Шунчалик байрамона кайфият улашаётганлари учун ҳокимимизга раҳмат, тани-жони соғ бўлсин», деса яна бири «Байрамона кайфият улашаётган ташкилотчиларга раҳмат, бизнинг туман ҳам Россиядан қолишмаяпти, фақат ‘свет’ ўчишини инобатга олмасак», дейди. Бошқаси эса «Бўлади-да, байрамона кайфият ҳам бўлиши керак-ку», дея ҳокимлик ишини олқишлайди.
«Дарё» воқеалар ривожини кузатишда давом этади.
Изоҳ (0)