Давлат божхона қўмитаси ходимлари Фарғона вилояти, Қўқон шаҳрида яшовчи фуқаронинг уйидан қиймати 700 миллион сўмлик, 28 минг қути ноқонуний сигареталар сақланаётганини аниқлади.
Қўмита ахборот хизмати раҳбари Ҳусан Тангриев «Дарё» мухбири билан суҳбатда ҳолат юзасидан маълумот берди.
Олдиндан кузатувга олинган Cobalt тўхтатилиб, кўздан кечирилганда, автомобилга республикага ноқонуний йўллар билан олиб кирилган, сифати кафолатланмаган ва божхона расмийлаштирув ҳужжатлари бўлмаган тамаки маҳсулотлари ортилгани фош бўлди. Тезкор ходимлар жараённи давом эттириб, ҳайдовчининг хонадонини ҳам текширди. Уйда 700 миллион сўмлик 28 минг қути ноқонуний тамаки маҳсулотлари сақланаётгани аниқланди. Ҳозирда ҳолат юзасидан терговга қадар текширув ҳаракатлари олиб борилмоқда», — деди қўмита расмийси.Шунингдек, 30 ноябрь куни Тошкент вилоятида ҳам божхоначилар томонидан кузатувдаги Isuzu тўхтатилиб, текширилган. Натижада юк автомобили юкхонасидан республикага контрабанда йўли билан олиб кирилган, хорижда ишлаб чиқарилган ва акциз маркаси билан маркаланмаган тахминий қиймати 603 миллион 400 минг сўмлик алкоголь ва тамаки маҳсулотлари борлиги аниқланган. Умуман олганда, мамлакатда бу каби ноқонуний ҳатти-ҳаракатлар сони ортиб бормоқда.
Хусусан, божхоначилар томонидан 2022 йилнинг ўтган 11 ойи давомида ноқонуний тамаки маҳсулотлари айланмасига оид 314 та ҳуқуқбузарлик ҳолатлари аниқланган. Оқибатда умумий қиймати 19 миллиард 200 миллион сўмлик 1 миллион 578 минг 346 қути ноқонуний тамаки маҳсулотлари ушлаб қолинган. Бу кўрсаткич 2021 йилнинг мос даврига нисбатан 9 фоизга кўпдир.
Изоҳ (0)