Электр ва газдан шикоят қилган фуқароларни қамоқ билан «огоҳлантирган» депутат ўз хоҳишига кўра ариза ёзди

Ижтимоий тармоқларда Янги Наманган кенгаши депутати Музаффар Жамолитдиновнинг Facebook ижтимоий тармоғига жойлаган пости (кейинчалик ўчириб ташланган) кенг муҳокамаларга сабаб бўлди. Депутат интернетда коммунал хизматлардан нолиб, танқид қилаётган фуқароларга мурожаат қилиб, қамоқхоналардаги камералар иссиқ ва ёруғ эканини эслатиб ўтган.

Пост қўйилгач, тармоқда кескин ва танқидий реакцияларга сабаб бўлди. Шу муносабат билан у ўз постига изоҳ бериш мақсадида Facebook тармоғида яна бир пост жойлади.

«Мен қўйган пост ижтимоий тармоқларда кенг танқидий муҳокамаларга сабаб бўлди. Мен газ ва электр билан боғлиқ танқидий материалларни тарқатмасдан, қамоқда эмаслигига шукр қилиш кераклиги, тинчлик ва хотиржамликнинг қадрига етишга оид матн жойлаган эдим», — деб ёзади Музаффар Жамолитдинов.

Унинг айтишича, фикрини тўлиқ ва батафсил ёритмагани оқибатида пост ижтимоий тармоқларда бошқача талқин этилган.

«Пост қўйилгач, турли гуруҳларда чиқа бошлаган муносабатлардан сўнг ўзим қўйган постни такрор-такрор ўқиб, нотўғри жойлаганимни англадим. Яъни, мендаги асл мақсад халқни қамалиши билан қўрқитиш ёки таҳдид қилиш эмас, балки тинчлик-хотиржамликнинг қадрига етишга қаратилган эди», — дея фикрларини изоҳлаган у.

Музаффар Жамолитдинов нима учун постда айнан қамоқ билан боғлиқ ҳолатга тўхталганига ҳам изоҳ берган:

«Бундан 6 йил аввал мен ўзим бир ишда айбланиб 10 ой қамоқ эҳтиёт чорасида турмада сақланганман. Шунда оилавий хотиржамлик, тинчлик ҳамма нарсадан устунлигини англаб етганман. Мен 10 ой давомида кечирган ташвишларим шу даражада оғир бўлганидан ҳамда яна қайтадан тикланиш жуда қийин бўлганидан айни кундаги электр ва газ билан боғлиқ муаммолар ўз назаримда енгилдек туюлди. Коммунал муаммолар билан боғлиқ турли видеоларни кўриб, хаёлимдан ‘бундан ҳам оғир ташвишларда юрганлар бор’ деган фикр билан пост жойлаган эдим».

У постни таҳдид деб қабул қилган фуқаролардан узр сўраган.

«Бугунги давлат сиёсати шу даражада инсонпарварки, халпарварки. ҳатто мен ўзим ҳам битта қўйган постим ортидан одамларнинг талқини ва танқидини муҳокама қилмасдан, депутатлик ваколатимни муддатидан аввал тугатиш ҳақида ариза бердим.

Ушбу муносабатни ўқиб чиқиб, постни жойлашдан бўлган асл мақсадни тушуниб етиб, айни вақтдаги мен учун оғир бўлган бир даврда қўллаб-қувватлаганларга катта миннатдорчилик билдираман», — дея сўзларини якунлаган Музаффар Жамолитдинов.