Жанубий Кореяда фаолият юритувчи ўқитувчилар кўнгилли равишда Ўзбекистондаги касб-ҳунар марказларида ёшларга касб-ҳунар сирларини ўргатади. Бу ҳақда «Дарё»га Бандлик ва меҳнат муносабатлари вазирлиги ахборот хизмати раҳбари Мавжуда Мирзаева хабар берди.
Вазирлик ахборот хизматининг маълумот беришича, вазир Нозим Ҳусановнинг Жанубий Кореяга ташрифи пайтида бу ҳақда келишувга эришилган.
Бандлик ва меҳнат муносабатлари вазири Нозим Ҳусанов ҳамда Корея халқаро ҳамкорлик агентлиги раҳбарияти ўртасидаги учрашувда бу ҳақда сўз борди. Келишувга кўра, ҳамкорлик асосида Ўзбекистондаги KOICA лойиҳалари ривожлантирилади. Кореядан кўнгилли ўқитувчиларни мамлакатимиздаги касб-ҳунарга ўқитиш муассасаларига жалб қилиш, билимни баҳолаш марказларини ташкил этиш масалалари юзасидан келишувга эришилди, — дейди Мавжуда Мирзаева.Вазирлик масъулининг қўшимча қилишича, Бандлик ва меҳнат муносабатлари вазирлиги ҳамда Жанубий Корея халқаро ҳамкорлик агентлиги 2012 йилдан бери ўзаро ҳамкорлик қилиб келмоқда.
Айни пайтда республикамиздаги тўртта KOICA касб-ҳунарга ўқитиш марказида электроника, ахборот технологиялари, автомобилсозлик, тикувчилик, сартарошлик-косметология каби талаб юқори касблар ўқитилмоқда. Айнан бу марказларга кореялик ўқитувчиларни жалб қилиш орқали ёшларимизни яна-да кучли мутахассис қилиб тайёрлаш ва хориж тажрибасини ҳам ўргатиш мақсад қилинган, — дейди Мавжуда Мирзаева.Шунингдек, вазир Жанубий Кореяга ташрифи чоғида Улсан шаҳрида Hyundai Heavy Industries кемасозлик компанияси президенти ЛИ Санг Кюн билан ҳам музокара ўтказган.
Учрашувда ушбу компанияга Ўзбекистон фуқароларини қўшимча равишда ишга жалб қилиш, меҳнат миграцияси соҳасида ҳамкорликни кенгайтириш масалалари муҳокама қилинди. Hyundai Heavy Industries компанияси 1972 йил март ойида Улсан шаҳрида ташкил этилган бўлиб, дунёдаги энг йирик кемасозлик компанияси ҳисобланади. 2014 йилда ушбу компания томонидан дунёдаги энг катта MV SSSL Globe номли контейнер кемаси қурилган. Айни пайтда Hyundai Heavy Industries’да 27 мингга яқин ходим меҳнат фаолиятини амалга ошириб келмоқда, шундан 200 нафарга яқини Ўзбекистон фуқаролари ҳисобланади, — дейди вазирлик масъули.
Изоҳ (0)