Бухорода фуқаро ИИБ биносида вафот этгани ҳақидаги хабарга муносабат билдирилди
Ижтимоий тармоқларда Бухоро вилояти Вобкент туманида яшаган фуқаро ички ишлар биносида вафот этгани ҳақида хабарлар тарқалди. Вилоят ИИБ ахборот хизмати ҳолатга аниқлик киритди.
Маълум қилинишича, Жиноят кодексининг 169-моддаси (ўғрилик) 2-қисми «в,г» бандлари билан қўзғатилган жиноят иши бўйича гувоҳ тариқасида жалб этилган фуқаро Қ.Ҳ. 28 ноябрь куни соат тахминан 15:00 да Бухоро шаҳри 4-сонли ИИБга жиноят иши ҳужжатлари билан танишиш учун келган. Аммо терговчининг хизмат вазифаси билан бошқа жойда бўлгани сабабли ИИБ биносига кирмасдан қайтиб кетган.
Фуқаронинг ИИБ биносига кирмасдан кетган ҳолати видеотасвирга муҳрланган. Шундан сўнг Қ.Ҳ. такси сифатида Matiz автомашинасини тўхтатиб, уни Бухоро шаҳридаги «Файзиобод» жоме масжидига олиб боришини сўраган. Йўлда фуқаронинг соғлиғи ёмонлашиб, оғзидан кўпик чиқиб, ҳушини йўқотган. Ҳайдовчи ҳушсиз йўловчини тезкорлик билан Бухоро шаҳри касалхонасига олиб борган.
Кўрсатилган тиббий муолажаларга қарамасдан, фуқаро шу куни соат тахминан 21:00 да касалхонанинг жонлантириш бўлимида вафот этган. Суд-тиббиёт экспертизасининг бирламчи хулосасига кўра ўлим тутқаноқ синдроми, ўпка ва мияга кислород ўткир етишмовчилиги оқибатида юз берган. Текширув жараёнида мурданинг баданида ҳеч қандай тан жароҳатлари аниқланмаган. Ҳолат шаҳар прокуратураси томонидан ўрганилмоқда.
Мавзуга доир:
- Қўқондаги қамоқхонада маҳкум вафот этди
- Андижонда ҳибсхонадаги маҳбус камерадошини уриб ўлдириб қўйди
- Қашқадарёдаги қамоқхонада маҳкум ўзини осиб қўйди. Унинг қариндошлари маҳкум ўз жонига қасд қилганига шубҳа қилмоқда. Сенат ишни назоратга олди
