АҚШ Россияни терроризм ҳомийси деб тан олишдан бош тортиши сабабини тушунтирди

АҚШ Россияни терроризм ҳомийси деб тан олишдан бош тортиши сабабларидан бири дон битими бўлган. Бу ҳақда мамлакатнинг Европа хавфсизлик ва ҳамкорлик ташкилоти (ЕХҲТ)даги доимий вакили Майкл Карпентер маълум қилди.

«Бу қонунчиликдан фойдаланишимиз натижасида Украинанинг босиб олинган қисмларига гуманитар кўмак бериш, шунингдек, бизнинг фикримизча, ҳам Украина, ҳам АҚШ манфаатларига жавоб берадиган бошқа хатти-ҳаракатларга, масалан, дон битимига ёрдам бериш бўйича имкониятларимиз чекланиб қолади, деб ўйлаймиз», — деди Карпентер.

Қора денгиз дон ташаббуси келишувлари 22 июль куни Истанбулда Туркия ва БМТ томонидан Россия ва Украина билан алоҳида-алоҳида имзоланган эди. Улар дон олиб чиқиб кетиш учун Украина портларини очишни ҳамда Россияга қарши Ғарб санкциялари киритилган бир пайтда мамлакатдан озиқ-овқат ва ўғитларнинг дунё бозорига етказилишига ёрдам беришни кўзда тутарди.

Сентябрь бошида АҚШ президенти Жо Байден «Россияни терроризм ҳомийси бўлган давлат сифатида тан олиш керакми, йўқми?» — деган саволга рад жавобини берган эди. Июль охирида АҚШ сенати давлат котиби Энтони Блинкенга шундай даъват билан резолюция қабул қилган эди.

Августда эса Россия Ташқи ишлар вазирлиги АҚШни мамлакат Вашингтон томонидан терроризм ҳомийси  деб тан олинган тақдирда, «ортга қайтмаслик нуқтаси»га етиб келиши ҳақида огоҳлантирди. Россия ТИВнинг Шимолий Америка департаменти директори Александр Дарчиев у ҳолда Россия АҚШ билан дипломатик алоқалар даражасини пасайтириши ёки уларни узиб ташлаши мумкинлигини истисно қилмади.