Украина ташқи ишлар вазири Дмитрий Кулеба НАТО мамлакатларини Украинага иложи борича тезроқ қурол-яроғ юборишга ва Ғарбда янги қурол ишлаб чиқариш корхоналарини очишга чақирмоқда. Бу ҳақда у Бухарестда НАТОга аъзо мамлакатлар вазирлари учрашуви доирасида НАТО бош котиби Йенс Столтенберг билан қўшма брифингда айтиб ўтди, деб ёзади «Европейская Правда».
Дмитрий Кулебанинг айтишича, аввалги учрашувда унинг асосий учта сўзи «қурол, қурол, қурол» бўлган. Ўшандан буён, унинг сўзларига кўра, Украина салмоқли даражада ёрдам олган, натижада Украина қуролли кучлари ўз ҳудудининг катта қисмини озод этган.
«Бугун эса мен бошқа учта сўзни таъкидлайман — ‘тезроқ, тезроқ, тезроқ’. Шу пайтгача қилинган нарсалар учун миннатдормиз. Аммо уруш ҳали давом этмоқда. Биз Россияни тор-мор қилишимиз мумкинлигини, ғолиб бўлишимиз мумкинлигини исботладик — биргаликда, бутун Евроатлантика макони ва бутун дунё манфаатлари йўлида. Бироқ Ғарбда қурол тақдим этиш, мудофаа саноатининг янги ишлаб чиқариш қувватларини ишга тушириш ҳақидаги қарорлар тезроқ қабул қилиниши керак, қурол етказиб бериш ҳам тезроқ амалга оширилиши керак. Биз айнан шу ҳақда — буларнинг барчасини қандай қилиб тезлаштириш ҳақида гаплашдик», — деди у.
Йенс Столтенберг Бухарестда НАТО «Украинага қанча керак бўлса, шунча ёрдам беришда давом этиши керак»лигини айтди. Унинг сўзларига кўра, НАТОга аъзо мамлакатлар Украинага қурол етказиб бериш ҳажмини ошириш ҳақида келишиб олмоқчи. Альянс бош котиби таъкидлашича, НАТО Украинага ёнилғи, дори-дармонлар, ҳарбийлар учун иссиқ кийим-бош ва бошқа кўмакни кўпроқ миқдорда етказиб бериши керак.
Аввалроқ НАТО вакили ташкилот таркибидаги 30 та давлатдан 20 тасида Украинага етказиб бериш учун қурол захиралари тугаб битгани ҳақида The New York Times’га маълум қилганди. Бироқ Франция, Германия, Италия ва Нидерландия каби йирик иттифоқчилар катта миқдорда қурол-яроғ тақдим этишда давом этиши мумкин, деган эди у.
Изоҳ (0)