Ўзбекистонда энг кўп чакана савдо қайси ҳудудларда амалга оширилаётгани маълум қилинди
Давлат статистика қўмитаси 2022 йил январь—октябрь ойлари бўйича чакана савдо айланмасини эълон қилди.
Мамлакат бўйича чакана савдо айланмаси 243,7 трлн сўмни ташкил этди. Бу 2021 йилнинг январь—сентябрь ойларига нисбатан 11,7 фоизга кўп.
Чакана савдо айланмасининг таркибий қисмлари 70,2 фоиз кичик бизнес ва хусусий тадбиркорлик субъектлари, 21,5 фоиз йирик корхоналар ва 8,3 фоизи уюшмаган савдо ҳиссасига тўғри келди.
2021 йилнинг январь—октябрь ойларига нисбатан Наманган (13,6 фоиз), Қашқадарё (13,1 фоиз), Жиззах (12,7 фоиз) вилоятларида чакана савдо товар айланмасининг кўпайиш суръатлари кузатилиб, энг юқори кўрсаткич Наманган вилоятида қайд этилди.
Сўнгги 6 йилликда чакана савдо товар айланмасининг юқори ўсиш суръати 2022 йилда кузатилди. Бунда чакана савдо товар айланмаси ўтган йилнинг мос даврига нисбатан 11,7 фоизни ёки 243,7 трлн сўмни ташкил қилди.
Товар айланмасида энг юқори улуш Тошкент шаҳрида — 25,5 фоиз яъни 62,1 трлн сўм бўлган.
Мамлакат чакана савдо товар айланмасида энг қуйи улушни Сирдарё вилояти 1,5 фоиз билан 3,7 трлн сўмни ташкил этди.
Йирик корхоналарнинг товар айланмаси ҳажми 2021 йилнинг январь—октябрь ойларига нисбатан 33,1 фоизга ўсди. Бу 52,4 трлн сўмга тенг. Бу эса умумий савдо ҳажмининг 21,5 фоиз улушига тўғри келди.
Кичик бизнес ва хусусий тадбиркорлик субъектлари чакана савдо товар айланмаси ҳажми 191,2 трлн сўмни ташкил этиб, 2021 йилнинг январь—октябрь ойларига нисбатан 7 фоизга кўпайди. Давлат миқёсида ушбу секторнинг жами улуши 78,5 фоизни ташкил этди.
Кичик бизнес ва хусусий тадбиркорлик субъектлари улуши бўйича Сирдарё (92,6 фоиз), Сурхондарё (91,7 фоиз) ва Наманган (91,7 фоиз) вилоятлари етакчилик қилмоқда.
Йирик корхоналарнинг улуши 21,5 фоизни ташкил этиб, энг катта улуш Тошкент шаҳрида (40,2 фоиз), Тошкент (26,6 фоиз) ва Самарқанд (20,5 фоиз) вилоятларида кузатилди.
2022 йилнинг январь—октябрь ойлари ҳолатига кўра, ўртача аҳоли жон бошига чакана савдо товар айланмаси 6,8 млн сўмни ташкил этди. Бу кўрсаткич 2021 йилнинг мос даврига нисбатан 9,4 фоизга ошган.
