Голливуд юлдузи Сандра Буллок вақтинчалик танаффусга чиққанини эълон қилди — 57 ёшли актриса 49 та фильмда ажойиб образлар яратган
30 йилдан ортиқ вақт давомида кўплаб ажойиб ролларни ўйнаган Сандра Буллок кўпчиликнинг қалбидан жой олган. Унинг сўнгги иши катта муваффақиятга эришган бўлса-да, 57 ёшида Сандра Буллок карьерасида вақтинчалик танаффус қилишини эълон қилди.
Драматургия факультети талабасидан Голливуд актрисасигача
Сандра Буллок АҚШда туғилган, лекин болалиги опера қўшиқчиси бўлган онаси ва армияда хизмат қилган отаси билан бирга Германияда ўтган. У санъатга меҳрни онасидан мерос қилиб олгани сабаб Шарқий Каролина университетида драматургияни ўрганиш учун Америкага қайтиб келади. Кино актрисаси сифатида дебют қилишдан олдин у Нью-Йоркда театр санъати бўйича ҳам таълим олган.
Кинодаги илк дебютини «Жаллодлар» (1987) фильмида, биринчи катта ролини эса «Ким ўқ узди?» фильмида ўйнайди. (1989). Актрисага машҳурликни Киану Ривз билан биргаликда ишлаган «Тезлик» (1994) триллери олиб келади. Карьера зинапоясига барқарор равишда кўтарилган Сандра турли жанрдаги фильмларда рол ўйнашни давом эттиради. 2006 йилда у яна Киану Ривз билан машҳур «Кўл бўйидаги уй» романтик драмасида биргаликда рол ижро этади.
Дунё миқёсида тан олиниши ва «Оскар»
2000-2010 йиллар давомида таниқли актриса ўзининг энг машҳур ролларини ўйнайди. Жумладан, у кассаларда хит бўлган «Мулойим хоним» комедиясида, Жорж Клуни билан «Гравитациял фильми ва «Кўринмас томон» биографик драмасида ажойиб образлар яратди.
Сўнгги фильми учун Сандра «Оскар»га сазовор бўлди. Фильмда кейинчалик муваффақиятли футболчига айланган болани асраб олган аёл ролини ўйнайди.
2010 йилларнинг охирида Сандра Буллок омадли фильмларда, жумладан, «Оушеннинг саккиз дугонаси», «Қуш қутиси» триллери ва «Йўқолган шаҳар» фильмларида суратга тушди. «Йўқолган шаҳар» саргузашт комедияси ва «Ўқдан тез» фильмидаги роллар актрисанинг яқин келажакдаги сўнгги лойиҳалари эди. Сандра Буллок актрисалик фаолияти давомида 49 та фильмда рол ижро этган.
46 ёшида актриса она бўлди ва кўп ўтмай ҳақиқий севгисини учратди
Сандра Голливуддаги баъзи актёрлар билан муносабат ўрнатганди. Масалан, собиқ юлдуз Тейт Донован билан муносабатлари 3 йил давом этди, кейинчалик у Метю Макконахи билан ишқий муносабатда бўлди. Жуфтлик 2 йилдан кейин ажрашган бўлса-да, улар ҳозиргача дўст бўлиб қолган.
46 ёшида актриса Луис Бардо исмли ўғил болани, орадан 5 йил ўтиб Лайло исмли қизчани асраб олди. Актриса она бўлганида у барча умидлари ушалганини айтди: «Менга ҳар доим яхши фарзанд сени ўзи топади, дейишарди».
2015 йилда Сандра Буллок фотограф Брайан Рендалл билан танишади. Актриса уни ўғлининг туғилган кунида суратга олиш учун чақирганди. «Ҳаётимдаги ҳақиқий севгимни топдим. Бизнинг 3 та чиройли фарзандимиз бор (Брайаннинг қизи )», — дейди Сандра.
«Мен жуда чарчадим», — дейди Сандра кино саноатдан вақтинчалик таннафус эълон қилар экан
Сандра Буллок кенг кўламли ва муваффақиятли лойиҳаларда иштирок этган, ҳозирда эса карьерасидан танаффус олишга қарор қилган. Яқинда берган интервьюсида актриса экранларни вақтинча тарк этиш қарори ҳақида гапирди: «Мен бировнинг иш жадвалига қараб яшашни хоҳламайман. Жуда чарчадим — адекват қарорлар қабул қилиш учун кучим йўқлигини ҳис қиляпман».
Актриса танаффус пайтида нима билан машғул бўлишига қизиқаётган бўлсангиз, у «ўзини бахтли ҳис қиладиган жойда» — оиласи билан бўлади: «Мен фақат болаларим ва оилам билан 24/7 бўлишни хоҳлайман».
Сандра бу танаффус қанча давом этишини айтмаган бўлса-да, бир нарса аниқ: унинг қайтишини интиқлик билан кутадиган мухлислари бор.
Мавзуга доир:
- Мусиқий чартларни «портлатган» альбом, 4-фарзандини кутаётган оила ва 3 марта турмушга чиққан Бритни Спирс: 2022 йилда Голливуд юлдузлари ҳаётида содир бўлган қувончли воқеалар
- Киану Ривз ва Вайнона Райдер: 30 йилдан бери дўст бўлиб келаётган мафтункор жуфтлик ҳикояси
- Кадр ортида яширинган сирлар: томошабинлар хаёлига ҳам келмаган актёрлик ҳийлалари
