Буюк Британиянинг собиқ бош вазири Борис Жонсон Украина касалхоналарига жўнатиладиган дори-дармон ва жиҳозлар учун Рождество йиғими бошланганини эълон қилди. Шунингдек, у Россия босқинидан озод қилинган Херсонга гуманитар ёрдамни машиналарга юклаш ва ташишда шахсан иштирок этди. Бу ҳақда Борис Жонсоннинг Twitter’даги саҳифасида маълум қилинди.
Жонсоннинг сўзларига кўра, у Circle Health Group — Буюк Британиядаги энг йирик хусусий шифохоналар тармоғи ташаббусида иштирок этган. Тармоқ Херсондаги касалхоналар учун 12 та юк машинасида тиббий асбоб-ускуналар тўплаган. Жонсоннинг ўзи эса 13-машинага замонавий тиббий каравот ва наркоз аппаратларини ортишга ёрдам берган.
Аввалроқ Борис Жонсонга Киевнинг фахрий фуқароси унвони берилган эди. Киев мери Виталий Кличко Жонсоннинг тинчлик даврида ҳам, урушнинг «энг кескин даврида» ҳам шаҳарга бир неча бор келганини ва кўплаб ёрдамини қайд этган.
Изоҳ (0)