Давлат органларининг нодавлат нотижорат ташкилотлар (ННТ) томонидан халқаро грантларни амалга оширишда ҳамкорлик қилишига оид ҳукумат қарори ижтимоий тармоқда айрим муҳокамаларга сабаб бўлмоқда. Адлия вазирлиги ҳолат юзасидан маълумот берди.
Қайд этилишича, муҳокамаларга сабаб бўлаётган «Нодавлат нотижорат ташкилотлари фаолиятининг кафолатлари тўғрисида»ги ва «Нодавлат нотижорат ташкилотлари тўғрисида»ги қонунлар мазмун-моҳияти юзасидан Адлия вазирлигига жамоавий мурожаат келиб тушган. Мазкур мурожаат ОАВ ва ижтимоий тармоқларда ҳам эълон қилингани муносабати билан Адлия вазирлиги томонидан ушбу мурожаатга дастлабки муносабат тайёрланиб, вазирликнинг расмий сайтида ва ОАВда эълон қилинган эди.
Ушбу мурожаатни батафсил ўрганиш ва мурожаат муаллифларининг важларини кўриб чиқиш мақсадида 24 ноябрь куни Адлия вазирлигида жамоавий мурожаат ташаббускорлари иштирокида учрашув ташкил этилди. Тадбирда адлия вазири ўринбосари М.Икрамов ҳукуматнинг 2019 йил 9 октябрдаги 858-сонли қарори мазмуни, унинг ҳукуматнинг 2022 йил 13 июндаги 328-сонли қароридан фарқли жиҳатлари ҳақида халқаро ва хорижий давлатлар қонунчилиги ва амалиётидан келиб чиқиб батафсил тушунтириш берди.
Вазир ўринбосари ушбу ҳукумат қарорлари барча халқаро ҳужжатларга ва Ўзбекистоннинг халқаро мажбуриятларига мувофиқ эканини, уларнинг қабул қилиниши амалдаги қонунлар ва президент ҳужжатлари ижросини таъминлашга қаратилганини, ушбу қарорларнинг давлат ва жамият учун заруриятини алоҳида таъкидлаб ўтди.
Учрашув иштирокчиларига мазкур қарорни қабул қилишдан асосий мақсад нодавлат нотижорат ташкилотларнинг халқаро грантларини амалга оширишда давлат органлари томонидан амалий ёрдам кўрсатиш бўйича ҳамкорлигини тартибга солишга қаратилгани етказилди.
Мурожаат ташаббускорлари учрашув давомида ҳукуматнинг ушбу қарори айрим давлат органлари томонидан амалиётда нотўғри қўлланилаётгани, ҳамкорлик доирасида нодавлат нотижорат ташкилотлари учун сунъий тўсиқлар яратилаётгани ва бунинг оқибатида мазкур қарорни қабул қилишдан кўзланган мақсадга ҳар доим ҳам эришиш имкони бўлмаётганини таъкидлаб ўтди.
Учрашув якунида ҳукуматнинг 2022 йил 13 июндаги 328-сонли қарорининг амалиётда қўлланишини янада чуқур ўрганиш ва аниқланган муаммоларни бартараф қилишга қаратилган таклифларни ишлаб чиқишга келишиб олинди.
Шунга кўра, мурожаат муаллифлари Ўзбекистон нодавлат нотижорат ташкилотлари миллий ассоциацияси шафелигида ишчи гуруҳни ташкил этган ҳолда ҳукуматнинг мазкур қарорига ўзгартириш ва қўшимчалар киритишни назарда тутувчи таклифларни ишлаб чиқиб, Адлия вазирлигига киритишни маъқуллади.
Изоҳ (0)