«Титаник» фильмидаги энг кекса қаҳрамонни гавдалантирган америкалик актриса Глория Стюарт ёшлигида қандай кўринишга эга бўлгани кўплаб томошабинларни қизиқтиради.
«Ўрта мактабни тугатганимда ҳамма менинг муваффақиятга эришишимни айтган. Бироқ буни қанча кутишим кераклигини билмасдим», — дейди Глория Стюарт. Америкалик актриса 87 ёшида — 1997- йилда «Титаник» фильмининг премьерасидан сўнг машҳур бўлди.
Глория бутун умри давомида ўнлаб ролларни ижро этган. Актрисанинг кино оламдаги илк роллари ҳам унинг машҳурликка эришишига сабаб бўлди, булардан бири 1932 йилда намойиш этилган «Эски қўрқинчли уй» даҳшатли фильми эди.
Хитга айланган фильм чиққандан кейин актрисанинг келажакда мувафаққиятга эришиши тахмин қилинган эди, бироқ унинг кинодан ҳафсаласи пир бўлди: у иш шароитига, масалан, 15 соатлик сменалар, тартибсиз овқатланиш ва бир хил ролларга чидай олмади.
«Мен қилаётган ҳамма ишимдан нафратланардим. Мен ёқимтой қизларнинг ролини ўйнашни хоҳламадим — бу роллар жуда чекланган эди. Театрда Чехов ва Шекспир асарларидаги қаҳрамонларни ўйнадим. Кинони тарк этишга қарор қилдим, чунки кино актрисаларига яхши муносабатда бўлишмади», — деб эслайди Глория. Кейинчалик у ҳақиқатан ҳам театрга ишга кирди, декупаж санъатида, примитивизм услубида расм чизишда ва бонсада ўзини синаб кўрди.
Томошабинлар Глория Стюартни 1990 йилларда актриса сифатида унута бошлашганида «Титаник» ҳақида фильм суратга олишни режалаштираётган ва Роузнинг ролини ўйнаши керак бўлган кекса аёлни қидираётган Жеймс Кемерон у билан учрашишга қарор қилади.
«Фильм ажойиб бўлишини дарҳол англадим, бу мен бутун умр кутган рол эди », — дейди актриса.
«Титаник» фильми катта экранларга чиққанидан кейин актриса Глория Стюарт 87 ёшида кино оламдаги фаолияти давомида иккинчи бор дунё бўйлаб машҳурликка эришди. Актриса бутун суратга олиш гуруҳи аъзолари ичида ҳақиқатан ҳам кема ҳалокатига учраган ягона инсон эди (ўшанда Глория 2 ёшда бўлган). У «Титаник» фильмидаги роли учун «Оскар» мукофотига ҳам номзод бўлган.
Қайсидир маънода Стюарт ўз қаҳрамонининг тақдирини такрорлади: у 100 йил яшади.
Изоҳ (0)