«Манчестер Юнайтед» ҳужумчи Криштиану Роналду билан ўртадаги меҳнат шартномасини бекор қилиши мумкин.
The Telegraph’нинг хабар қилишича, клуб футболчининг шов-шувли интервьюси сабаб санкцияларнинг турли вариантини кўриб чиқяпти.
Улар орасида Криштиану билан шартномани ўзаро бекор қилиш ҳам бор. Фақат форвард мавсум охиригача мўлжалланган маошлар компенсация қилинишини талаб қилмаган тақдирдагина бу иш амалга оширилади.
Бироқ жамоа раҳбарияти Роналду айнан шуни хоҳлаётганидан хавотирда. Клуб ортиқча харажатга қўл урмоқчи эмас, шу билан бирга уни жамоада қолдириб бўлмаслигини ҳам англаб турибди.
Якуний қарор чиқаришдан аввал «Манчестер Юнайтед» интервьюнинг тўлиқ версияси чиқиши кутади, у чоршанба ёки пайшанба куни эълон қилиниши кутилмоқда. Янги аргументлар чиққан тақдирда клуб «келишув шартларининг бузилиши»ни важ қилган ҳолда битимни бир томонлама бузиш ҳуқуқига ҳам эга бўлиши мумкин.
ESPN маълумотларига кўра, раҳбарият 37 ёшли футболчининг клубдаги тақдирини белгилашни Эрик тен Ҳагга топширади.
Клуб Роналдунинг интервьюси борасида баёнот берар экан, барча фактлар очиқлангандан кейин ўз қарорини беришини ва ҳозирда мавсумнинг иккинчи ярмига тайёргарлик жараёнига эътибор қаратганини маълум қилган.
Мавзуга доир: «Тен Ҳагни ҳурмат қилмайман. Клуб менга хиёнат қилди» — Роналду «Манчестер Юнайтед»даги вазият ҳақида кескин гапирди
Изоҳ (0)