«Ҳамма ўз вазифасини виждонан бажарса, ҳеч ким порталларга ёзиб чиқмайди». Нуриддин Зайнитдинов масалалар маҳалланинг ўзидан бошлаб ҳал қилиниши кераклигини айтди

«Дарё» Тошкент шаҳри ҳокимлиги қошидаги Жамоатчилик кенгаши билан биргаликда «Маҳалла. Муаммо. Мулоҳаза» лойиҳасини тақдим этиб келмоқда. Лойиҳанинг 6-сон мавзуси «Маҳалла, депутат, ҳокимият — ўзаро алоқа тизими» бўлиб, дастур меҳмони сифатида депутат Нуриддин Зайнитдинов таклиф этилди.

Нуриддин Зайнитдиновнинг фикрича, қонунчиликда ҳамманинг элементар функцияси, вазифаси бор. Агар ҳар битта бўғинда (маҳалла раиси, депутат, ҳокимият вакили, ҳоким ёрдамчиси, ёшлар етакчиси, аёллар бўйича фаол, ким бўлишидан қатъи назар) ҳамма ўз вазифасини виждонан бажарса, маҳалладаги ҳеч қайси муаммо ташқарига чиқмайди, шу жойнинг ўзида ҳал қилинади, порталларга ариза билан ёзилмайди. Масалаларни маҳалланинг ўзидан бошлаб ҳал қилиш керак.

Лекин бизда унақа эмас. Амалиётда кўрадиган бўлсак, одамлар арзимаган муаммоси билан ҳам юқори ташкилотларга арз қилаверади. Ўзи арзимаган муаммо, шундоқ ҳал қилса бўлади. Йўқ, у ариза ёзади, мурожаатнинг кетидан 10 та одам овора бўлади, уни ёпаман, ҳал қиламан деб, вақти кетади. Масала ечилмаса, анави мурожаатчи яна ёзади.

Бир хил ходимларнинг иш вақти фақат мана шундай мурожаатларни ёпиш билан ўтиб кетади. Кўп вақти кетиб қоляпти, — дейди депутат.