Ўзбекистонда овлаш тақиқланган тасқара отиб ўлдирилгани ҳақида хабар берилганди. Давлат экология қўмитаси матбуот хизмати ҳолат юзасидан қўшимча маълумот берди.
Дастлабки ўрганишларда фотосуратдаги фуқароларнинг шахси ва манзили аниқланди. Унга кўра, Андижон вилояти Хонобод шаҳри «Фозилмон» ва «А.Навоий» маҳалласида яшовчи А.С. ва Р.Ф. 2018 йилда Хонобод шаҳрининг «Хидиша» маҳалла жойлашган «Ғалабанинг эллик йиллиги» фермер хўжалиги ҳудудида тасқара қушини жонсиз ҳолатда ушлаб суратга тушган.
Ушбу фуқаролар айни пайтда чет элда бўлиб, улардан бири — Р.Ф. тез орада Ўзбекистонга қайтиши кутилмоқда. Ҳолат юзасидан қўшимча маълумот берилиши маълум қилинди.
Маълумот учун, тасқара Ўзбекистон Қизил китобига киритилган ўтроқ, мозаик тарқалган қуш тури ҳисобланади. Жиноят кодексининг 202-моддаси «ж» бандига кўра, Қизил китобга киритилган ҳайвонот ёки ўсимлик дунёси турлари нобуд қилинган бўлса, базавий ҳисоблаш миқдори (300 минг сўм)нинг тўрт юз бараваридан олти юз бараваригача миқдорида жарима ёки уч йилдан беш йилгача озодликни чеклаш ёхуд уч йилдан беш йилгача озодликдан маҳрум қилиш жазоси қўлланади.
Мавзуга доир:
Изоҳ (0)