Станцияларимиз қишки мавсумда аҳоли ва тадбиркорларга узлуксиз газ етказиб беришга тайёр – «Ўзтрансгаз»

«Ўзтрансгаз» АЖ томонидан ОАВ вакиллари учун Тошкент шаҳри ва вилоятида жойлашган газ тақсимлаш станцияларига (ГЦ) пресс-тур ташкил этилди. Тур давомида станцияларнинг куз-қиш мавсумига тайёргарлик ҳолати, истеъмолчиларни табиий газ билан таъминлаш имкониятлари тўғрисида маълумот берилди.

Иштирокчилар дастлаб «Ўрта сарой» ГЦ фаолияти билан таништирилди. «Ўзтрансгаз» АЖ Тошкент магистрал газ қувурлари бошқармаси муҳандиси Жалолиддин Юсуфжоновнинг айтишича, айни пайтда станция куз-қиш мавсумига шай ҳолатда.

Бошқарма томонидан хизмат кўрсатиладиган ушбу станция Нурафшон шаҳри аҳолисини табиий газ билан таъминлайди.

Станциянинг ўтказувчанлик қуввати соатига 60 минг метр кубни ташкил этади. Бу шаҳар аҳолисининг ҳозирги (соатига 53 минг метр куб) эҳтиёжидан анча юқори кўрсаткич.

Қишда истеъмолчиларнинг газга бўлган талаби ортади. Шу сабабли кучли босимлар юзага келишини ҳисобга олиб, станцияга қуввати юқори бўлган диафрагмалар ўрнатдик.

Газ етказиб берувчи барча қурилмаларимиз қишки мавсумга тайёр, – деди мутахассис.

Пресс-тур давомида журналистлар газни назорат қилиш ва ўлчашнинг автоматлаштирилган тизимида ишлаётган «Бектемир» ГЦ базасида бўлди. Станция оператори Абдуалим Ҳолиқов бу ердаги замонавий ускуналар афзаллиги ҳақида гапириб берди.

Станция республикада биринчи бўлиб автомотлаштирилди ва ҳозирда ишлаш жараёни синовдан ўтказилмоқда.

Станцияда инсон омили минимал даражага туширилган, яъни уни тўғридан-тўғри диспечерга боғланиб, масофадан бошқариш имконияти яратилган. Лойиҳа яхши самара берса, келгусида республикадаги бошқа газ тақсимлаш станцияларида ҳам шу каби тизим яратилади.

Базада кранларни очиб-ёпиш автоматлаштирилган. Станцияда электр энергиясини тежаш мақсадида қуёш панеллари ҳам ўрнатилган. Автоматлаштирилган газ тақсимлаш станциясининг умумий ишлаш қуввати соатига 388 минг метр кубни ташкил этади.

Ҳозирги кунда соатига 200 минг метр куб газ чиқариб берилмоқда. Куз-қиш мавсумига тайёргарлигимиз жуда яхши. Режа асосида ишлаяпмиз. Аҳоли ва тадбиркорларни газдан узилиб қолмаслиги учун кеча-ю кундуз навбатчилик режими ўрнатилган, – деди оператор.

Навбатдаги ташриф Ўзбекистондаги энг йирик газ тақсимлаш станцияси – «Тошкент-2»га бўлди. Катта оператор Рифат Эргашев мазкур станция имкониятлари ҳақида сўзлаб берди.

«Тошкент-2» газ тақсимлаш станцияси 1998 йилда иш бошлаган. Станция бутун пойтахт аҳолисига табиий газ етказиб беради. Унинг ўтказувчанлик қуввати соатига қарийб 1 миллион 100 минг метр кубга тенг. Станцияда 10 та тармоқ мавжуд.

Айни пайтда газ етказиб берувчи ускуналар қишги мавсумга тайёр. Кранлар мойланди. Барча ускуналарнинг ишлаш жараёни қайта кўриб чиқилди. Бемалол аҳолига узлуксиз газ етказиб бера оламиз. Бунинг учун барча шароит ва имкониятлар етарли», – деди у.

Маълумот учун, бугунги кунда республика бўйлаб «Ўзтрансгаз» АЖ тасарруфида 420 та газ тақсимлаш станцияси ишламоқда.