БМТ бош котиби иқлим конференциясида янглишиб, бошқа маърузани ўқиб берди (видео)

БМТ бош котиби Антониу Гутерриш COP27 иқлим саммитида хатолик туфайли бошқа маърузани ўқиб берди. Тадбирдан олинган видеони Sky News эълон қилди.

https://twitter.com/SkyNews/status/1590444113018597376

Шарм-аш-Шайхдаги конференцияда чиқиш қилиб, Гутерриш углерод ажралмаларини назорат қилиш бўйича кириш нутқини ўқиб бериши керак эди.

«Дунё иқлим инқирозига қарши курашда мағлубиятга учраяпти, лекин менинг умидим сизлардан. Сиз қарорлар қабул қилувчи шахсларни жавобгарликка тортишда қатъий турдингиз», — дея ўз нутқини бошлади БМТ бош котиби ва шошиб қолди. У гапиришдан тўхтаб, нутқи ёзилган қоғозларни титкилай бошлади.

«Менга адашиб бошқа нутқни беришган, шекилли», — деди у кулиб.

Унга зарур ҳужжатлар келтириб берилгач, залда тўпланган делегатлар қарсак чалиб юборишди. Гутерриш эса шу куни кейинроқ бир гуруҳ ёш делегатлар олдида чиқиш қилишини ва бу нутқ уларга аталганини тушунтирди.

«Бундан кейин бир гуруҳ ёшлар билан суҳбатлашмоқчиман, кичик чалкашлик юзага келибди. Узр сўрайман», — дея БМТ бош котиби йиғилганларга юзланди.

Мисрнинг Шарм-аш-Шайх шаҳрида БМТнинг иқлим ўзгаришлари бўйича 27-конференцияси (COP27) бўлиб ўтмоқда, у 6 ноябрда бошланган бўлиб, 18 ноябргача давом этади.