Rossiyaning Birlashgan Millatlar Tashkilotidagi doimiy vakolatxonasi da’vo qilishicha, BMT bosh kotibi Antoniu Guterrish Lugansk, Donetsk, Zaporojye va Xerson viloyatlarini Rossiyaga qo‘shib olish xalqaro huquq normalariga to‘g‘ri kelmasligini bildirib, tashkilot nizomining xolislik haqidagi 100-moddasini buzdi.

“Bosh kotib va ​​kotibiyat faqat tashkilot oldida mas’ul bo‘lgan xalqaro amaldorlar sifatidagi mavqeyiga ta’sir qilishi mumkin bo‘lgan har qanday xatti-harakatlardan tiyilishi kerak, ya’ni ular doimo xolis harakat qilishi kerak”, — deyiladi Rossiya doimiy vakolatxonasi bayonotida.

Diplomatlar, shuningdek, Guterrish Donbass respublikalari, Xerson va Zaporojye viloyatlari aholisining o‘z taqdirini o‘zi belgilash huquqiga “tajovuz” qilib, ikki tomonlama standartlar ko‘rsatdi, deb hisoblamoqda.

Guterrish 29-sentabr oqshomida Ukraina hududlarining Rossiyaga qo‘shilishi bo‘yicha o‘tkazilgan “referendumlar” haqida fikr bildirgan edi.

“Bir davlat hududining kuch bilan tahdid qilish yoki kuch ishlatish natijasida boshqa davlat tomonidan bosib olinishi BMT ustavi va xalqaro huquq tamoyillarining buzilishi hisoblanadi”, — degan Guterrish.

Uning qo‘shimcha qilishicha, Ukrainaning qo‘ldan boy berilgan hududlaridagi referendumlar “davom etayotgan qurolli nizo sharoitida” hamda “Ukraina huquqiy va konstitutsiyaviy maydonidan tashqarida” o‘tkazilgan. “Ularni haqiqatan ham xalq xohish-istagining aks etishi deb atab bo‘lmaydi”, — ta’kidlagan Guterrish.