Avvalroq Guterrish so‘nggi sakkiz yil Yerdagi meteorologik kuzatuvlar tarixidagi eng issiq yil bo‘lganini ma’lum qilgandi. Bu yil harorat 150 yil oldingi sanoatdan oldingi davrga qaraganda 1,15 daraja issiq bo‘ldi.
Birlashgan Millatlar Tashkiloti Bosh kotibi Antoniu Guterrish Misrdagi COP27 iqlim konferensiyasidagi nutqi chog‘ida global haroratning ko‘tarilishi tufayli yuzaga kelayotgan yerning ayanchli taqdiri haqida gapirdi, deb xabar qiladi “RBK”.
“Issiqxona gazlarining chiqindilari ortib bormoqda. Global harorat ko‘tarilishda davom etmoqda. Va bizning sayyoramiz iqlim betartibligini tuzatib bo‘lmaydigan darajadagi keskin nuqtaga yaqinlashmoqda. Biz ‘do‘zax iqlimi’ sari yo‘ldamiz, oyog‘imiz esa gazda (tezlatkich — tah. izohi)”, — dedi Guterrish.
6-noyabr kuni BMT Bosh kotibi so‘nggi sakkiz yil meteorologik kuzatuvlar tarixidagi eng issiq yil bo‘lganini aytgandi.
Hisobotga ko‘ra, joriy yilda global o‘rtacha harorat sanoatdan oldingi davrga (19-asrning ikkinchi yarmi) nisbatan 1,15 darajaga yuqori bo‘ldi. Guterrishning ta’kidlashicha, iqlim o‘zgarishi “halokatli tezlikda” sodir bo‘lmoqda va sayyora “qayg‘u signalini yubormoqda”.
Iqlim konferensiyasi arafasida turli ekologik harakatlar vakillari Yevropada iqlim o‘zgarishi muammosiga e’tiborni qaratish maqsadida bir necha aksiyalar o‘tkazdi. 5-noyabr kuni Amsterdamda Extinction Rebellion va Greenpeace Netherlands harakati faollari Niderlandiyaning asosiy aeroporti – Shipholdan shaxsiy reaktiv samolyotlar parvozini to‘sib, reyslar sonini kamaytirishni talab qildi.
Aksiya ishtirokchilari samolyotlar ostiga joylashdi, ba’zilari o‘zlarini ularga zanjirband qilishga harakat qildi. Namoyish tinch o‘tgan bo‘lsa-da, aeroportni normal ish rejimiga qaytarish uchun oxir-oqibat politsiyaning aralashuvigacha olib borildi.
Bundan tashqari, oktabr—noyabr oylarida ekofaollar dunyoning turli muzeylaridagi bir nechta san’at obyektlariga — masalan, Niderlandiyadagi Mauritshuis muzeyida Yan Vermeerning “Marvarid sirg‘ali qiz” kartinasiga zarar yetkazishga harakat qilgan.
Izoh (0)