АҚШ собиқ президенти Жорж Буш Владимир Зеленский билан жамоатчилик олдида онлайн учрашув ўтказмоқчи
АҚШнинг собиқ президенти кичик Жорж Буш Украина президенти Владимир Зеленский билан онлайн тарзда биринчи оммавий учрашув ўтказади, деб хабар берди CNN кичик Жорж Буш институтига таяниб.
«Американинг Украинани қўллаб-қувватлашда давом этиши муҳимлигини яна бир бор тасдиқлаш мақсадида АҚШ собиқ президенти Жорж Буш келаси ҳафта Украина президенти Владимир Зеленский билан жамоатчилик олдида муҳокама ўтказади», — дейилади хабарда.
Телеканал маълумотларига кўра, тадбир Даллас шаҳрида (Техас) бўлиб ўтади. У томошабинлар учун очиқ форматда ўтказилади, Зеленский унда видеоалоқа орқали иштирок этади.
«Бушнинг ўзи АҚШ Киевни қўллаб-қувватлашни давом эттириши жуда муҳим, деган фикрда», — таъкидлади кичик Жорж Буш институтининг глобал сиёсат бўйича бошқарувчи директори Дэвид Крамер.
Зеленский ва Буш шу йилнинг май ойида видеоалоқа орқали учрашув ўтказганди. Бу сиёсатчиларнинг биринчи мулоқоти бўлган, дея аниқлик киритади CNN. Шунингдек, Буш Россия босқини бошланганидан кейин Зеленский билан гаплашган биринчи АҚШ собиқ президенти бўлди, деб ёзган Axios. Ўшанда ҳам у Украинани қўллаб-қувватлашини билдирган. Зеленский, ўз навбатида, Америка собиқ президентини «замонамизнинг Уинстон Черчилли» деб атаган ва уни Украинага таклиф қилган.
Кичик Жорж Буш Республикачилар партияси вакили бўлиб, CNN телеканалининг сўнгги маълумотларига кўра, партия оралиқ сайловларда Конгресснинг ҳар икки палатасидаги умумий ўринлар сони бўйича демократлар устидан ғалаба қозонмоқда. Вакиллар палатасида ҳозирча республикачилар 209 ўринни, демократлар эса 192 ўринни эгаллаб турибди. Сенатда ўринлар деярли тенг тақсимланган – республикачилар 49 ўрин билан демократлардан бир ўринга олдинда. Сайловнинг якуний натижалари ҳали эълон қилинмади.
