Қулоқлар битишининг сабаби нима ва унга қарши қандай курашиш мумкин?

Кўпчилик, эҳтимол, баландликка кўтарилаётганда, самолётда учганида ёки метрога тушаётганда тўсатдан қулоқларнинг битиб қолишига дуч келган. Аслида ушбу ҳолатда оғриқ сезилмайди, лекин ноқулайлик пайдо бўлади. Шунинг учун бу ҳодисанинг сабабини топиш ва у билан қандай қилиб тўғри курашишни ўрганиш муҳимдир, деб ёзади «Woman».

Қулоқ битиши: сабаблар

Агар қулоқлар бица, бунинг сабаблари турлича бўлиши мумкин. Асосий сабаблардан бири юқори баландликда, чуқурликда юзага келадиган босимнинг кескин пасайиши ҳисобланади. Бундай шароитда қулоқ тезда қайта тиклана олмайди ва қулоқ пардаси қулоқ ичидаги босимни мувозанатлаштирадиган найчага босила бошлайди. Бундай жараён қулоқларни битишига олиб келади. Бунинг сабаблари принципиал жиҳатдан аниқ, бир мунча вақт ўтгач, қулоқ очилади, аммо бу ҳодиса баъзи ҳолларда оғриқ билан бирга кузатилади.

Қулоқларнинг битиши кам тарқалган, аммо муҳим сабабларидан бири баъзи ички органлар билан боғлиқ муаммолар туфайли бўлиши мумкин. Яъни қулоқ ва томоқ орасидаги найча яллиғланиш жараёнида ушбу ҳолат юзага келади. Кўпинча яллиғланиш шамоллаш ёки оддий тумов натижасида кузатилади. Шунинг учун шамоллаш вақтида ЛОР шифокоридан маслаҳат сўраш тавсия этилади. Шунингдек, найчадаги муаммо бурундаги полип, гайморит ёки аденоид туфайли ривожланиши мумкин.

Агар қулоқлар битишида юқоридагилар сабаб бўлмаса, эшитиш қобилиятининг йўқолиши юзага келаётган бўлиши мумкин. Бу қон кам таъминланган эшитиш нервининг шикастланиши туфайли пайдо бўлади. Кўпчилик бундай муаммога эътибор бермайди, чунки шовқинли жойларда эшитиш қобилиятини йўқотишнинг асосий белгиси қулоқ битишидир.

Шунингдек, қулоқ битиши сабаби юрак муаммолари, гипертония, ишемик мия касаллиги ва бир қатор мия шикастланишлари бўлиши мумкин.

Қулоқ битишининг яна бир сабаби болаликда ўтказилган отит касаллиги туфайлидир. Шу сабабли қулоқ пардаларида ёпишқоқлик пайдо бўлади, бу уларнинг ҳаракатчанлигининг ёмонлашишига олиб келди. Бундай ҳолда, битиб қолган қулоқлар муаммоси доимо безовта қилади.

Қулоқ битишини қандай даволаш мумкин?

Албатта, бу борада жуда эҳтиёт бўлиш керак, чунки бу муаммони ҳал қилиш унинг сабаби билан бевосита боғлиқ. Агар қулоқлар фақат баландликка кўтарилаётганда ёки метрога тушаётганда битиб қолса, унда ҳеч қандай соғлиқ муаммоси бўлмаслиги мумкин, аммо барибир шифокор томонидан тўлиқ кўрикдан ўтган маъқул.

Бундай ҳолда, махсус томчи дорилари қулоқ битиши учун тез ёрдам бўлиб хизмат қилади, уларни бурунга томизиш керак, аммо бундай чора фақат муаммони зудлик билан ҳал қилиш керак бўлган экстремал ҳолатларда қўлланилиши мумкин.

Қулоқ битишига қарши курашишнинг энг кенг тарқалган чоралари:

• эснаётгандек оғиз бир неча марта кетма-кет очилади;
• оғиз ёпилади ва бурун қисилиб, нафас ушлаб турилади;
• конфетни олиб, сўриш бошланади, сўлакни тўплаб, ютиб юборилади;
• кичик қултумларда сув ичилади;
• агар чуқурликда сузиш туфайли қулоқлар битиб қолса, бармоқлар билан бурунни чимчилаб, қулоқдан сув чиқаришга ҳаракат қилиш керак. Бу чора оғриқни камайтиради, аммо агар яна такрорланса, шошилинч равишда шифокорга мурожаат қилиш керак.

Ҳар бир инсоннинг қулоғи битади, аммо бунинг сабаблари бутунлай асоссиз ва ўз-ўзидан ўтиб кетиши ёки аксинча, жиддий соғлиқ муаммолари билан ҳам боғлиқ бўлиши мумкин. Шунинг учун соғлиққа масъулият ва эҳтиёткорлик билан муносабатда бўлиш орқали кўплаб муаммолардан ҳимояланиш керак.