«Олий маълумотга эга бўлмаган ҳоким ёрдамчиларини давлат олий таълим муассасаларига суҳбат асосида ўқишга қабул қилиш тартиби тўғрисидаги низомни тасдиқлаш ҳақида»ги ҳукумат қарори лойиҳаси эълон қилинди.
Унга кўра, олий маълумотга эга бўлмаган ҳоким ёрдамчиларини давлат ОТМлари иқтисодий таълим йўналишлари бўйича давлат гранти асосида сиртқи таълим шаклида ўқитиш харажатларини молиялаштириш давлат буюртмаси (давлат гранти) асосида кадрлар тайёрлаш учун давлат бюджетидан ажратиладиган маблағлар доирасида амалга оширилади.
Ўқишга қабул қилиш Қорақалпоғистон Вазирлар Кенгаши раиси, вилоятлар ва Тошкент шаҳар ҳокимлари тавсияномасига эга бўлган ҳоким ёрдамчилари (тавсияномага эга бўлган абитуриентлар) ҳисобидан, кейинчалик ушбу тизимда беш йил ишлаб бериш шарти билан иқтисодиёт соҳаси бўйича бакалавриат таълим йўналишлари сиртқи таълим шаклига суҳбат натижаларига асосан амалга оширилади.
Тавсияномалар Қорақалпоғистон Вазирлар Кенгаши раиси, вилоятлар ва Тошкент шаҳар ҳокимлари томонидан берилади ва фақат берилган ўқув йили учун амал қилади. Тавсияномалар сони ҳудудлар кесимида Ўзбекистон давлат ОТМларига ўқишга қабул қилиш жараёнларини мувофиқлаштириш бўйича давлат комиссияси қарори билан белгиланади.
Олий таълим муассасаси қабул комиссияси раиси томонидан тавсияномага эга бўлган абитуриентлар билан суҳбат ўтказиш бўйича алоҳида суҳбат комиссияси ташкил этилади. Суҳбат комиссияси 7 нафардан кам бўлмаган таркибда тузилади ва таркибига соҳа бўйича юқори малакали профессор-ўқитувчилар, соҳа мутахассислари киритилади. Суҳбат комиссияси таркибига Қорақалпоғистон Вазирлар Кенгаши, вилоятлар ва Тошкент шаҳар ҳокимликлари вакиллари ҳам киритилиши мумкин.
Тавсияномага эга бўлган абитуриентлар билан суҳбат жараёни тўлиқ видеокузатув остида ўтказилади ва жараёнлар кузатувчилар учун ажратилган алоҳида кутиш жойига онлайн трансляция қилиб борилади.
Суҳбат жараёни ҳар йили 5 сентябрдан 15 сентябргача, ОТМ томонидан белгиланган муддатда, суҳбат комиссияси таркиби камида учдан икки қисми иштирок этган тақдирда ўтказилади.
Суҳбат жараёнида абитуриентлар ҳар бирига қуйидаги мавзулар бўйича биттадан жами тўртта савол берилади: мамлакатда амалга оширилаётган ислоҳотлар моҳияти ва аҳамияти; белгиланган бакалавриат таълим йўналишини танлашдан асосий мақсад; белгиланган бакалавриат таълим йўналишига мос меҳнат фаолияти давомида эришган ютуқ ва натижалари; белгиланган бакалавриат таълим йўналиши соҳасида билим ва касбий кўникмалар мавжудлиги.
Ҳар бир саволга 25 баллдан ажратилади. Жами тўплаш мумкин бўлган энг юқори балл 100 баллни ташкил этади. Саволлар ОТМ қабул комиссияси томонидан ишлаб чиқилиб, комиссияси раиси томонидан тасдиқланади.
Эслатиб ўтамиз, президентнинг «Маҳаллада тадбиркорликни ривожлантириш, аҳоли бандлигини таъминлаш ва камбағалликни қисқартириш масалалари бўйича ҳоким ёрдамчилари фаолиятини ташкил этиш чора-тадбирлари тўғрисида» ги қарорига мувофиқ 2022/2023-ўқув йилидан бошлаб олий маълумотга эга бўлмаган ҳоким ёрдамчиларини давлат олий таълим муассасаларининг иқтисодий таълим йўналишларига Қорақалпоғистон Вазирлар Кенгаши раиси, вилоятлар ва Тошкент шаҳри ҳокимларининг тавсияси билан давлат гранти бўйича сиртқи таълим шаклига суҳбат асосида ўқишга қабул қилиш амалиётини жорий этиш белгиланган.
Мавзуга доир: Ўзбекистонда ҳоким ёрдамчилари фаолиятини қўллаб-қувватлаш жамғармаси тўғрисидаги низом тасдиқланди
Изоҳ (0)