“Oliy ma’lumotga ega bo‘lmagan hokim yordamchilarini davlat oliy ta’lim muassasalariga suhbat asosida o‘qishga qabul qilish tartibi to‘g‘risidagi nizomni tasdiqlash haqida”gi hukumat qarori loyihasi e’lon qilindi.
Unga ko‘ra, oliy ma’lumotga ega bo‘lmagan hokim yordamchilarini davlat OTMlari iqtisodiy ta’lim yo‘nalishlari bo‘yicha davlat granti asosida sirtqi ta’lim shaklida o‘qitish xarajatlarini moliyalashtirish davlat buyurtmasi (davlat granti) asosida kadrlar tayyorlash uchun davlat budjetidan ajratiladigan mablag‘lar doirasida amalga oshiriladi.
O‘qishga qabul qilish Qoraqalpog‘iston Vazirlar Kengashi raisi, viloyatlar va Toshkent shahar hokimlari tavsiyanomasiga ega bo‘lgan hokim yordamchilari (tavsiyanomaga ega bo‘lgan abituriyentlar) hisobidan, keyinchalik ushbu tizimda besh yil ishlab berish sharti bilan iqtisodiyot sohasi bo‘yicha bakalavriat ta’lim yo‘nalishlari sirtqi ta’lim shakliga suhbat natijalariga asosan amalga oshiriladi.
Tavsiyanomalar Qoraqalpog‘iston Vazirlar Kengashi raisi, viloyatlar va Toshkent shahar hokimlari tomonidan beriladi va faqat berilgan o‘quv yili uchun amal qiladi. Tavsiyanomalar soni hududlar kesimida O‘zbekiston davlat OTMlariga o‘qishga qabul qilish jarayonlarini muvofiqlashtirish bo‘yicha davlat komissiyasi qarori bilan belgilanadi.
Oliy ta’lim muassasasi qabul komissiyasi raisi tomonidan tavsiyanomaga ega bo‘lgan abituriyentlar bilan suhbat o‘tkazish bo‘yicha alohida suhbat komissiyasi tashkil etiladi. Suhbat komissiyasi 7 nafardan kam bo‘lmagan tarkibda tuziladi va tarkibiga soha bo‘yicha yuqori malakali professor-o‘qituvchilar, soha mutaxassislari kiritiladi. Suhbat komissiyasi tarkibiga Qoraqalpog‘iston Vazirlar Kengashi, viloyatlar va Toshkent shahar hokimliklari vakillari ham kiritilishi mumkin.
Tavsiyanomaga ega bo‘lgan abituriyentlar bilan suhbat jarayoni to‘liq videokuzatuv ostida o‘tkaziladi va jarayonlar kuzatuvchilar uchun ajratilgan alohida kutish joyiga onlayn translyatsiya qilib boriladi.
Suhbat jarayoni har yili 5-sentabrdan 15-sentabrgacha, OTM tomonidan belgilangan muddatda, suhbat komissiyasi tarkibi kamida uchdan ikki qismi ishtirok etgan taqdirda o‘tkaziladi.
Suhbat jarayonida abituriyentlar har biriga quyidagi mavzular bo‘yicha bittadan jami to‘rtta savol beriladi: mamlakatda amalga oshirilayotgan islohotlar mohiyati va ahamiyati; belgilangan bakalavriat ta’lim yo‘nalishini tanlashdan asosiy maqsad; belgilangan bakalavriat ta’lim yo‘nalishiga mos mehnat faoliyati davomida erishgan yutuq va natijalari; belgilangan bakalavriat ta’lim yo‘nalishi sohasida bilim va kasbiy ko‘nikmalar mavjudligi.
Har bir savolga 25 balldan ajratiladi. Jami to‘plash mumkin bo‘lgan eng yuqori ball 100 ballni tashkil etadi. Savollar OTM qabul komissiyasi tomonidan ishlab chiqilib, komissiyasi raisi tomonidan tasdiqlanadi.
Eslatib o‘tamiz, prezidentning “Mahallada tadbirkorlikni rivojlantirish, aholi bandligini ta’minlash va kambag‘allikni qisqartirish masalalari bo‘yicha hokim yordamchilari faoliyatini tashkil etish chora-tadbirlari to‘g‘risida” gi qaroriga muvofiq 2022/2023-o‘quv yilidan boshlab oliy ma’lumotga ega bo‘lmagan hokim yordamchilarini davlat oliy ta’lim muassasalarining iqtisodiy ta’lim yo‘nalishlariga Qoraqalpog‘iston Vazirlar Kengashi raisi, viloyatlar va Toshkent shahri hokimlarining tavsiyasi bilan davlat granti bo‘yicha sirtqi ta’lim shakliga suhbat asosida o‘qishga qabul qilish amaliyotini joriy etish belgilangan.
Mavzuga doir: O‘zbekistonda hokim yordamchilari faoliyatini qo‘llab-quvvatlash jamg‘armasi to‘g‘risidagi nizom tasdiqlandi
Izoh (0)