Зеленский Украинада денгиз дронлари флотини яратиш режасини эълон қилди

Украинада келаётган ҳафтадан денгиз дронлари флотини яратиш учун маблағ йиғиш бошланади, дея маълум қилди президент Владимир Зеленский ўзининг Telegram-каналидаги видеомурожаатида.

Зеленский ушбу ғояни миллионлаб украиналиклар қўллаб-қувватлашига ишонч билдирди: «Менимча, ҳамма бу нима экани ва нима учунлигини тушунади. Бу қандай ишлашини аллақачон ҳамма кўрди».

Зеленский бу ташаббус фақат Украинанинг денгиз ҳудудини ҳимоя қилишга қаратилганини таъкидлаб, «биз бировникига даъво қилмаймиз» деди.

Россия 10 октябрдан буён Украина шаҳарлари ва инфратузилмасига асосан дронлар билан зарба бермоқда. Бундай зарбалар Қрим кўпригидаги портлашдан кейин бошланган, уни эса, Россия ҳукумати фикрича, Украина махсус хизматлари уюштирган. 31 октябрь куни Киевда кетма-кет портлашлар содир бўлди. Ўша куни Киев, Харьков ва Запорожье янги зарбаларга учради.

Маълумотларга кўра, Россия Украинага зарба бериш учун Эронда ишлаб чиқарилган дронлардан фойдаланмоқда. Дастлаб Эрон ва Россия Теҳрон Москвага жанговар дронлар етказиб бераётганини рад этди. 5 ноябрь куни Эрон ташқи ишлар вазири Ҳусайн Амир Абдуллахон мамлакат Украинада «махсус операция» бошланишидан олдин Россияга ҳарбий дронлар партиясини топширганини тан олди.