«Ҳеч кимни ҳайдаб юбормаймиз». Даврон Кабулов Алишер Ботировнинг «Миллион» жамоасидан кетганига изоҳ берди (видео)

Халқлар дўстлиги саройида 20-30 октябрь кунлари «Миллион» кулги жамоасининг янги концерт дастури бўлиб ўтмоқда.

Ҳар бир концерти катта қизиқиш билан кутиладиган «Миллион» жамоасини жамоанинг яна бир аъзоси Алишер Ботиров тарк этди.

Концертга қисқа муддат қолганида Алишер Ботировнинг жамоадан кетгани ҳақида Даврон Кабулов «Дарё» мухбири Феруз Муҳаммадга берган қисқа интервьюсида муносабат билдирди.

Томошабинлар бир нарсани инобатга олишларини сўраган бўлардим. Биз ҳам иссиқ жонмиз. Иккинчидан аслида бизни «Миллион»га ҳеч ким боғлаб бермаган. Шу сабабдан «Миллион»да авлодлар алмашинуви бўлиши жуда ҳам нормал ва жуда ҳам табиий ҳолатдир. Агар авлодлар алмашинуви бўлмаганида, футболда ҳали ҳам Мародана ва Пеле ўйнаб юрган бўларди. Шунинг учун бу ҳолатга жуда ҳам оддий ёндашиш керак, деб ўйлайман.

Битта ўйинчи ўзининг ўрнини бўшатиб бераётгани, бу иккинчи янги, ҳозирча пастроқ даражадаги, лекин эртага яна ҳам кучлироқ бўлиб очилиши мумкин бўлган ижрочига имкониятлар эшигини очади.

Назаримда «Миллион» жамоаси охирги беш йил давомида исталган иштирокчи билан хайрлашган тақдирда ҳам, ишлашда, ҳаракатланишда давом этишини менимча исботлаб келяпти, деб ўйлайман.

Бундан кейин ҳам вазифамиз ўзгармайди. Ёш, истеъдодли йигит ва қизларни саҳнага қадам қўйишига сабабчи бўлиш, уларга имконият бериш, ижроларини яхши томондан халққа намойиш этиш вазифамиз, қолгани барибир уларнинг ўзига боғлиқ, биз имкон қадар сабабчи бўлсак, шундан хурсанд бўлиб қоламиз.

Алишер билан биз ёмон хайрлашишимиз мумкин эмас эди, деб ўйлайман. Чунки шу вақтгача, бирга босиб ўтган йўлимиз ҳам бунга йўл бермас эди. Ҳаётда бизнинг ака-укалигимиз, дўстлигимиз ва қадрдонлигимиз сақланиб қолди. Биз саҳнадан ташқари ҳолатларда доимо бир-биримизни қўллаб-қувватлаймиз. Масалан Умиджон Ҳайдаров ҳам саҳнани орқасида туриб, савол-жавоб шартимизда бизга ёрдам бериб, турли қизиқ вариантлар айтиб турди.

Бир нарсани тушунишларингизни хоҳлайман. Биз «Миллион»дан ҳеч кимни «бор, йўқол» деб ҳайдаб юбормаймиз. Бунга маънан ҳақли ҳам эмасмиз. Чунки озгина бўлса ҳам «Миллион»га ҳиссаси қўшилган ижрочини бизга катта аҳамияти бор, деб ўйлаймиз. Лекин одамлар билан, жамоа билан шунчаки, дўстона хайрлашиб кетиш ҳам мумкин-ку. Кимдир ўзининг ҳурматига ўтириб кетмаса, ҳаммани қарорини қўллаб-қувватлаб, ҳурмат қиляпмиз. «Кетаман», деган ижрочини қўлидан ушлаб турмаяпмиз, ишлайман деганни йўлига тўсиқ қўймаяпмиз, имконияти бўлиб, биз билан бирга бўлса, биз фақат хурсанд бўляпмиз. Лекин менинг йўлим бошқа томонда деса, унга фақат омад тилаб қоламиз, бошқа ортиқча гап-сўз бўлиши ҳам мумкин эмас.

Даврон Кабулов, «Миллион» кулги жамоаси аъзоси, шоумен