«Кутаман» қўшиғи билан халқ меҳрини қозонган ижодкор Ўлмас Оллаберганов айни кунларда АҚШда истиқомат қилмоқда. Хонанда «Дарё» мухбири Наргизахон Муродова билан суҳбатда хорижга кетишига нима сабаб бўлгани ҳақида сўзлаб берди.
— АҚШга кетиш ниятимиз аввалдан режамизда бор эди. Чунки бундан аввал ҳам етти марта бу ерда келиб, бир муддат яшаганман. Ҳамма билганидек АҚШ имкониятлар, янгиликлар мамлакати. Кенжа ўғлим Усмонжон АҚШда ўқиш учун узоқ вақт тайёрланди. У Ўзбекистонда инглиз тилига ихтисослашган мактабда ўқиб, Америкадаги университетга ҳужжат топширди. Интилган инсон албатта, муродига етади. У Виржения штатидаги университетга қабул қилинганидан сўнг, уни ёлғизлатиб қўймаслик учун АҚШга келдим. Ҳар бир ота-она фарзандини нуфузли университетларда ўқитишни орзу қилади. Бундан орзу менда ҳам бўлган, шунинг учун бу ерга келиб яшашга иккиланмадим, — дейди хонанда Ўлмас Оллаберганов.
Айримларнинг фикрича, АҚШга кетишингизнинг асосий сабаби Ўзбекистонда ижод қилолмаганингиз билан боғлиқ экан. Бу фикрлар қанчалик асосли?
— Ижодкорларнинг ҳаётини кузацангиз, уларнинг кўпчилиги бир ерда муқим яшамаган. Ижодий илҳомланиши учун саёҳат қилиб, турар жойларини ўзгартириб туришган. Ижодимда ҳам қандайдир турғунлик ҳолати бўлди. АҚШга келиш ижодимга ҳам ижобий таъсир этади, деб ҳисобладим. Чунки Ватанда узоқда яшаш ижодкорга ўзгача илҳом беради. АҚШда ёлғизланиб қолаётганим йўқ, чунки бу ерда ўзбек оилалари жуда кўп. Улар ўзбекона тўй қилишади ва унга таклиф этишади. АҚШга келишимнинг яна бир сабабларидан бири бу ердаги миллатдошларимизга ўзбек мусиқа ва қўшиқларини эслатиб туриш ниятим ҳам бор, — дейди Ўлмас Оллаберганов.
Суҳбат давомида у айрим ота-оналар фарзандини хорижда ўқитишдан қўрқиши ҳақидаги фикрга ўз муносабатини билдирди.
— Оиласида мустаҳкам тарбия олган бола ҳеч бир мамлакатга бориб, ахлоқий жиҳатдан ўзагриб қолмайди. АҚШда инсонларга болалигидан катта эркинлик берилади. Яъни уларда қилиб бўлмайди, мумкин эмас деган тушунчалар умуман йўқ. Агар фарзанд болаликдан шу ерда улғайса, ахлоқида қандайдир ўзгаришлар бўлиши мумкин. Аммо Ўзбекистонда туғилиб, тарбия олган фарзанд бу ерга келиб бирдан ўзгариб қолмайди. Интилиши бор болани қўллаб-қувватлаш керак, — дейди хонанда.
Хонанда океан орти мамлакатида унга нималар ёққани ҳақидаги саволга қуйидагича жавоб берди.
— Энг муҳими бу ерда қонунлар ишлайди. Ҳар бир фуқаро ким бўлишидан қатъий назар қонун олдида тенг ҳуқуқ ва бурчларга эга. Бундан ташқари, бу ерда миллатчилик тушунчаси йўқ эканлигига ва у қаттиқ қораланишига ҳам қойил қолдим. Одамлар худди бир-бирини танийдигандек, самимий муносабатда бўлишади, — дейди хонанда Ўлмас Оллаберганов.
Мавзуга доир:
- «Бу ерда қолиб кетишни истамаслигимни ич-ичимдан ҳис этаман». «Сардор» сериалидаги сержант Дурдона Турсунбоева АҚШда қадоқловчи сифатида иш бошлаб, бриллиант сотувчисига айлангани ҳақида
- McDonald’sда идиш ювган актёр, Россияда уй қурган хонанда. Мусофирликни бошдан кечирган ўзбекистонлик санъаткорлар (фото)
- АҚШда яшаётган яна бир ўзбекистонлик актёр Аҳмад Бердимуродов ҳаётидаги энг катта йўқотиш ҳамда орзулари ҳақида гапирди
- Актриса Юлдуз Ҳамидова 6 йилдан бери АҚШда яшаётгани ҳамда ҳозирда нима иш қилаётгани ҳақида сўзлаб берди
Изоҳ (0)