Дунё ҳақиқатда кўп қутбли бўлиб бормоқда, «янги куч марказлари мустаҳкамланаётган» Осиё эса бундай дунёвий тартибга ўтишда аҳамиятли рол ўйнамоқда. Бу ҳақда Россия президенти Владимир Путин Остонада бўлиб ўтаётган Осиёда ҳамкорлик ва ишонч чоралари кенгаши (ОҲИЧК) саммитида айтиб ўтди, деб ёзади «РБК».
Путин қайд этишича, учрашув глобал сиёсат ва иқтисодиётдаги жиддий ўзгаришлар фонида бўлиб ўтмоқда. «Осиё минтақаси мамлакатлари жаҳон иқтисодий тараққиёти локомотиви ҳисобланади… Биз Осиёнинг ривожланиши ва гуллаб-яшнаши ҳамда ушбу мақсадларда ўзаро манфаатли савдо ва инвестициявий ҳамкорлик бўйича кенг ва очиқ макон яратилиши тарафдоримиз», — деди у.
Путиннинг сўзларига кўра, Россия халқаро ҳуқуқ тамойилларига асосланган тенг ва бўлинмас хавфсизлик тизимлари яратилишини ёқлаб чиқади ҳамда Осиё мамлакатлари билан биргаликда уни шакллантириш учун ҳамма нарсани қилади.
Шунингдек, Россия президентининг фикрича, жаҳон молия тизимининг ишлаш тамойилларини қайта кўриб чиқиш керак, чунки ҳозиргиси «‘олтин миллиардъга аҳамиятли даражада бировлар ҳисобига яшаш имконини бермоқда». Бунинг учун биринчи қадам миллий валюталардан фаолроқ фойдаланиш бўлиши мумкин, деди Путин.
Бир қутбли дунё модели номақбул экани ҳақида Путин кўп маротаба айтиб ўтган. Ушбу мавзудаги энг кўзга кўринган ва шов-шувга сабаб бўлган нутқларидан бирини у 2007 йилда Мюнхен хавфсизлик конференциясида сўзлаган эди.
Шунингдек, Самарқанддаги ШҲТ саммити доирасида «бир қутбли дунёни юзага келтиришга уринишлар сўнгги вақтларда мутлақо хунук қиёфа касб этгани»ни таъкидлаганди.
Мавзуга доир:
- Путин МДҲдаги можароларни СССР парчаланиши натижаси деб атади
- «Путин ва Тўқаев энди ўзаро дўст ёки ишончли ҳамкор бўла олмайди» — сиёсатшунос Камолиддин Раббимов Россия ва Қозоғистон муносабатлари ҳақида
- Путин МДҲга Коллектив хавфсизлик шартномаси ташкилоти ҳузурида кузатувчи мақомини беришни таклиф қилди
Изоҳ (0)