«5 сонияда пулингизни ўғирлаб, Африкага жўнатиб, ечиб олишади». Шуҳрат Қурбонов пластик карта маълумотларини ошкор қилиш оқибатлари ҳақида

«Дарё» интернет-нашри ҳамда Тошкент шаҳри ҳокимлиги қошидаги Жамоатчилик кенгаши ҳамкорлигида ташкил этилган «Маҳалла. Муаммо. Мулоҳаза» лойиҳасининг 2-сони меҳмони — Telegram’даги «Kurbanoff.net» канали муаллифи, иқтисодчи Шуҳрат Қурбонов бўлди. Кўрсатувнинг бу галги мавзуси — онлайн фирибгарлик.

Кўрсатув меҳмонининг таъкидлашича, ҳозир турли дўконлар, харид шохобчалари, исталган тўлов нуқталарида кассирларга пластик карта рақамларини айтмаслик керак. Бунинг ўрнига, терминалда карта пин-кодини фуқаронинг ўзи киритиши керак.

Ҳозир фарқи йўқ, чет эл картасими ё миллий картами, 5 сонияда пулингизни ечиб олиб, Африкадаги бир давлатга ўтказиб, у ёқдан АҚШга ўтказиб, у ёқдан яна бир давлатга уриб, нақдлаштиришлари мумкин. Чунки технологиялар ўзгариб кетган.

Умуман тутиб ололмай қоласиз. Негаки, бу халқаро фирибгарлик даражасига чиққан, катта пул айланади. Телефон қилишади, Click’данман, PayMe’данман, Осонъданман, Call-center’данман деб. Эътироб берсангиз, кўпинча русча гапиришади, кўпинча аксент билан гаплашишади. Ё россиялик, ё украиналик бўлиб чиқади-да.

Яъни, бу халқаро масштабдаги масала. Уларга фарқи йўқ, пул қайси давлатдан келаётганининг. Улар ўзига битта сценарий қилиб олади, гуруҳга тарқатишади ва шу бўйича ишлайди, — дейди Шуҳрат Қурбонов.